بەيسەنبى كۇنى نيدەرلاندتىڭ روتتەردام پورتىندا بولعان جارىلىس سالدارىنان كەمىندە ءبىر ادام قازا تاۋىپ، تاعى بىرنەشە ادام جارالاندى. بۇل تۋرالى قالالىق پوليسيا مالىمدەدى، دەپ حابارلايدى infohub.kz.
پوليسيانىڭ مالىمەتىنشە، ەۋروپاداعى ەڭ ءىرى پورتتاعى جارىلىس بەيسەنبى كۇنى تاڭعى ۋاقىتتا بولعان. وقيعا ورنىندا تەرگەۋ جۇمىستارى جۇرگىزىلۋدە، جارىلىستىڭ سەبەبى انىقتالۋدا.
جارىلىس پورتتىڭ ۇلكەن اۋماعىنداعى ونەركاسىپتىك ايماقتا ورنالاسقان Gunvor Energy كومپانياسىنىڭ مۇناي وڭدەۋ زاۋىتى مەن وتىن تەرمينالىندا بولدى. نيدەرلاندتىڭ NOS تەلەارناسىنىڭ حابارلاۋىنشا، سول جەردە جوندەۋ بريگاداسى قۇبىرلاردىڭ ءبىر بولىگىندە جۇمىس ىستەپ جاتقان.
روتتەردامنىڭ جەدەل قىزمەتتەرى پورتتا ءىرى ەلەكتر قۋاتىنىڭ اقاۋى بولعانىن حابارلاپ، ترانسفورماتوردىڭ بەلگىسىز سەبەپتەرمەن ورتەنگەنىن مالىمدەدى. بىرنەشە كومپانيا جۇمىسىن توقتاتىپ، قىزمەتكەرلەردى ەۆاكۋاسيالادى.
بىرنەشە ساعاتتان كەيىن پورتتىڭ ونەركاسىپتىك ايماعىنداعى كومپانيالارعا ەلەكتر قۋاتى بىرتىندەپ قالپىنا كەلتىرىلدى. وندا بىرنەشە مۇناي جانە گاز كومپانيالارى ورنالاسقان، ءورت سوندىرۋشىلەر كەزەكشىلىكتە تۇر. ەلەكتر قۋاتىنىڭ اقاۋى مەن جارىلىستىڭ اراسىندا بايلانىس بار-جوعى ازىرگە بەلگىسىز.