قازاقستاننىڭ ەڭبەك سىڭىرگەن قۇرىلىسشىسى نيزامحان سۋلايمانوۆتىڭ ۇلى ازيز سۋلايمانوۆقا تيەسىلى «رسۋ-1» قۇرىلىس كومپانياسى 2025 جىلدىڭ قورىتىندىسى بويىنشا 2،3 ملرد تەڭگە پايدا تاپتى. ءبىر جىل بۇرىن بۇل كورسەتكىش 359،6 ملن تەڭگە بولعان، ياعني ءوسىم 6،4 ەسەگە جەتكەن. بۇل دەرەكتەر ۇيىمنىڭ قارجىلىق ەسەپتىلىگىندە كەلتىرىلگەن، دەپ حابارلايدى infohub.kz سايتى.
ساتىپ الۋشىلارمەن جاسالعان شارتتار بويىنشا ءتۇسىم 2025 جىلى 3،9 ملرد تەڭگەگە جەتتى، ال 2024 جىلى 808،1 ملن تەڭگە بولعان — 4،8 ەسەگە ارتقان. 2025 جىلدىڭ سوڭىندا بولىنبەگەن پايدا 3،4 ملرد تەڭگەنى قۇرادى.
«رسۋ-1» كومپانياسى شىمكەنتتىڭ قاراتاۋ اۋدانىندا تىركەلگەن جانە قۇرىلىس-مونتاج جۇمىستارىمەن اينالىسادى. 2025 جىلدىڭ سوڭىندا جانە جاريالانىم دايىندالعان ساتتە كومپانيانىڭ جالعىز يەسى — ازيز سۋلايمانوۆ. سونىمەن قاتار، ول جەكە كاسىپكەر مارتەبەسىنە يە جانە جەكە ءبىلىم بەرۋ مەكەمەلەرىنە جالعىز ءوزى يەلىك ەتەدى: «ءىلياس جانسۇگىروۆ اتىنداعى جالپى ورتا مەكتەپ» (شىمكەنت) جانە «سۇلەيمان اتا بالاباقشاسى» (شىمكەنت).
ەسەپتىلىكتە اتاپ وتىلگەندەي، 2022–2025 جىلدارى كومپانيا تۇرعىن جانە الەۋمەتتىك ماقساتتاعى نىسانداردى، ونىڭ ىشىندە كوپپاتەرلى تۇرعىن ۇيلەردى، ءبىلىم بەرۋ جانە قوعامدىق ينفراقۇرىلىم نىساندارىن، سىرتقى ينجەنەرلىك جەلىلەر مەن ىلەسپە ينفراقۇرىلىمدى سالدى. سونىمەن قاتار، ۇيىم عيماراتتاردى كۇردەلى جانە اعىمداعى جوندەۋدەن وتكىزىپ، اۋماقتاردى اباتتاندىرۋمەن اينالىستى.
اشىق دەرەككوزدەردە نيزامحان سۋلايمانوۆتىڭ ەڭبەك جولىن رسۋ-1-دە بەتونشى بولىپ باستاعانى، سامارقاند قۇرىلىس ينستيتۋتىن (وزبەكستان) بىتىرگەن سوڭ رسۋ-1-گە قايتا ورالىپ، قىزمەت باسپالداعىنىڭ بارلىق ساتىسىنان ءوتىپ، مەملەكەتتىك ۇيىمنىڭ باسشىسى قىزمەتىنە دەيىن كوتەرىلگەنى تۋرالى مالىمەتتەر بار. رسۋ-1 تاراتىلعاننان كەيىن ول ونىڭ بازاسىندا ءوزىنىڭ اتتاس قۇرىلىس كومپانياسىن قۇرعان. ونىڭ كاسىپورنى وڭتۇستىك قازاقستان/تۇركىستان وبلىسىندا مەكتەپتەر، بالاباقشالار جانە باسقا دا نىسانداردى بەلسەندى تۇردە سالعان. قازاقستاننىڭ ەڭبەك سىڭىرگەن قۇرىلىسشىسى نيزامحان سۋلايمانوۆ 2020 جىلدىڭ قىركۇيەگىندە 70 جاسقا تولعان. قولدا بار دەرەكتەرگە قاراعاندا، ازيز نيزامحان ۇلى سۋلايمانوۆ كومپانيا نەگىزىن قالاۋشىنىڭ ۇلى.