ۇلىبريتانيادا 1994 جىلعى رۋاندا گەنوسيدىنە قاتىسى بار دەپ ايىپتالعان 65 جاستاعى دارىگەر سوتقا تارتىلدى. ول وسى قىلمىس بويىنشا ەلدە جاۋاپقا تارتىلعان تۇڭعىش ادام. ۆينسەنت براۋن (بۇرىنعى ەسىمى ۆينسەنت بادجينيا) ۆەستمينستەر ماگيسترات سوتىندا ءوزىنىڭ ءاتى-جونى مەن مەكەنجايىن راستادى. ول قاماۋدا وتىر. بۇل تۋرالى infohub.kz سايتى حابارلايدى.
ايىپتالۋشىعا گەنوسيدكە قاتىسى بار ارەكەتتەر جاسادى دەگەن ايىپ پەن ادامزاتقا قارسى قىلمىس رەتىندە التى ءولتىرۋ ەپيزودى بويىنشا ايىپ تاعىلدى. ءىس قازاننىڭ 9-ى كۇنى ولد-بەيلي سوتىندا قارالاتىن بولدى. كەپىلگە شىعۋ تۋرالى ءوتىنىش سەيسەنبى كۇنى قارالادى.
1994 جىلى رۋانداداعى قىرعىن 100 كۇنگە سوزىلدى. وسى ۋاقىتتا حۋتۋ ەكسترەميستەرى تۋتسيلەر مەن قالىس قالعان حۋتۋلەرگە قارسى جاپپاي قىرۋ جۇرگىزدى.
براۋنعا قاتىستى ايىپتاۋلار 1994 جىلى 6 ءساۋىر مەن 13 ءساۋىر ارالىعىندا كيگاليدىڭ رۋگەنگە اۋدانىندا بولعان قىرعىنعا قاتىستى. ول تۋتسي ەتنيكالىق توبىنىڭ وكىلدەرىن «ولتىرۋگە، باسشىلىق ەتۋگە نەمەسە يتەرمەلەۋگە» قاتىسى بار دەپ ايىپتالىپ وتىر، سونداي-اق بۇل توپتى «تۇتاس نەمەسە ءىشىنارا جويۋدى» كوزدەگەن.
پروكۋرورلاردىڭ مالىمدەۋىنشە، وعان 2001 جىلعى حالىقارالىق قىلمىستىق سوت تۋرالى زاڭعا سايكەس گەنوسيد جاسادى دەگەن ايىپ تاعىلىپ وتىر. ايىپتالعان قىلمىستار «بەيبىت تۇرعىندارعا قارسى باعىتتالعان كەڭ تارالعان نەمەسە جۇيەلى شابۋىلدىڭ بولىگى بولدى، ءارى شابۋىل تۋرالى بىلە وتىرىپ جاسالدى».
ءبىر ءۇيدىڭ ءۇش تۇرعىنى، سونداي-اق تاكسي جۇرگىزۋشىسى، ءبىر ايەل جانە ونىڭ كىشكەنتاي ۇلى ولتىرىلگەن دەپ ايىپتالىپ وتىر. قازا تاپقاندار: دومينيك مۋكۋراريندا، يمماكۋلە مۋكانكۋسي، گەراسي رۋرانگيرۆا، لەاندرە مبوگويە، شارلوتت كاماگۋجا جانە وليۆە تۋييشيمە.
براۋن — 1980 جىلدارى رۋاندادا ءبىلىم العان مەديسينا دارىگەرى. كەيىن كيگاليدەگى ەلدىڭ وتباسىلىق دەنساۋلىق ساقتاۋ دەپارتامەنتىنىڭ باسشىسى بولىپ، ايەلى مەن كىشكەنتاي ۇلىمەن قالانىڭ شەتىندە تۇردى.
2006 جىلى ول لوندوندا ورنالاسقان، رۋاندا سياقتى ەلدەردەن كەلگەن بوسقىندارعا كومەكتەسەتىن Praxis قايىرىمدىلىق ۇيىمىندا جۇمىس ىستەدى. سونداي-اق 2003 جىلى ۇلىبريتانيا ۇكىمەتىنە كەڭەس بەرۋ ءۇشىن قۇرىلعان بوسقىن مەدبيكەلەرىنىڭ جۇمىس توبىندا قىزمەت اتقاردى.
جوعارى لاۋازىمدى پوليسيا قىزمەتكەرلەرى بۇعان دەيىن ۇلىبريتانيا اسكەري قىلمىسكەرلەر دەپ ايىپتالعاندار ءۇشىن ءقاۋىپسىز باسپانا بولماۋى كەرەكتىگىن اتاپ وتكەن. تەرگەۋشىلەر حالىقارالىق اسكەري قىلمىستار تۋرالى زاڭناما بويىنشا وقىتۋدان وتكەن.
براۋننىڭ ادۆوكاتى سەم بلوم-كۋپەر سوتقا ونىڭ كليەنتى ايىپتاۋلاردى جوققا شىعاراتىنىن جانە «وسى قورقىنىشتى ايىپتاۋلاردىڭ داعىن» اقتاۋ ءۇشىن القابيلەر الدىنا شىعۋدى كوزدەپ وتىرعانىن ايتتى. ول ايىپتالۋشى وسى كۇندى 20 جىلعا جۋىق ۋاقىت بويى كۇتكەنىن، اڭساعانىن جانە دۇعا ەتكەنىن جەتكىزدى.
«بۇل — 1994 جىلى جاسالعان قورقىنىشتى قىلمىستار، سۇمدىق ولتىرۋلەر. ءبىراق بۇل — دوكتور براۋن ءۇشىن اياقتالۋدىڭ باسى»، — دەدى ادۆوكات.
رۋانداداعى باسقا دا گەنوسيد قىلمىستارى بويىنشا تەرگەۋ جالعاسۋدا.