قوستاناي وبلىسىندا ماس كۇيدە جول-كولىك وقيعاسىن جاساعان جۇرگىزۋشى سوت الدىندا جاۋاپ بەردى. ەر ادام قاماۋعا الىنىپ، كولىك جۇرگىزۋ قۇقىعىنان ايىرىلدى، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسىندا جازىلعانداي، رۋدنىي قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتى جۇرگىزۋشىگە قاتىستى ءىستى قارادى. ول ماس كۇيدە كولىك باسقارىپ، م ۇلىككە زالال كەلتىرگەن جول-كولىك وقيعاسىن جاساعان (قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 608-بابىنىڭ 3-بولىگى).
ءىس ماتەريالدارىنا سايكەس، 2026 جىلدىڭ قىركۇيەگىندە ەر ادام ماس كۇيدە كولىك باسقارىپ، رۋدنىيداعى فرانكو كوشەسىمەن كەلە جاتىپ، قالا اكىمدىگىنىڭ تۇرعىن ۇي-كوممۋنالدىق شارۋاشىلىق بولىمىنە تيەسىلى مەتالل جارىق باعاناسىنا سوعىلعان. سونىڭ سالدارىنان ماتەريالدىق زالال كەلتىرىلگەن.
مەديسينالىق كۋالاندىرۋ قورىتىندىسى بويىنشا، قۇقىق بۇزۋشىلىق جاسالعان ساتتە جۇرگىزۋشى ورتاشا دارەجەدەگى ماس كۇيدە بولعان.
سوت وتىرىسىندا ەر ادام اكىمشىلىك قۇقىق بۇزۋشىلىق جاساعانىن تولىق مويىندادى.
اكىمشىلىك جازا شاراسىن بەلگىلەۋ كەزىندە سوت جاسالعان قۇقىق بۇزۋشىلىقتىڭ سيپاتى مەن قوعامدىق قاۋىپتىلىك دارەجەسىن، كىنالىنىڭ جەكە باسىن، سونداي-اق ءىس بويىنشا بارلىق ءمان-جايلاردى ەسكەردى. سوت قاۋلىسىمەن جۇرگىزۋشى كىنالى دەپ تانىلىپ، وعان 20 تاۋلىك قاماۋ تۇرىندەگى اكىمشىلىك جازا جانە 7 جىلعا كولىك جۇرگىزۋ قۇقىعىنان ايىرۋ تاعايىندالدى.
قاۋلى زاڭدى كۇشىنە ەنگەن جوق.