قىرعىزستان پرەزيدەنتى سادىر جاپاروۆ تالاستا ەل تاۋەلسىزدىگىنىڭ 35 جىلدىعىنا ارنالعان سالتاناتتا شەتەلدە تۇراتىن قىرعىزداردى قاتتى سىنعا الىپ، مانقۇرتتىققا ايىپتادى، دەپ حابارلايدى infohub.kz سايتى.
ايماقتىق باسىلىمنىڭ مالىمەتىنشە، مەملەكەت باسشىسى شەتەلدە جۇرگەن كەيبىر وتانداستارىن سىنعا الدى. سونىمەن قاتار ول شەتەلدە ەڭبەك ەتىپ جۇرگەن قىرعىزستاندىقتارعا ەل ەكونوميكاسىنا قوسقان ۇلەسى ءۇشىن جەكە العىس ايتتى.
شىڭعىس ايتماتوۆتىڭ شىعارماشىلىعىنا توقتالعان سادىر جاپاروۆ مانقۇرت بەينەسىن جانە ءوز تاريحىن، ءتىلىن، مادەنيەتىن ۇمىتقان قوعامنىڭ تراگەدياسىن ەسكە سالدى.
«شەتەلدە جۇرگەن سونداي ۇلدارىمىز سول جەردەن تاپقان ءبىر ءۇزىم نان ءۇشىن ءوز ەلىندە بولىپ جاتقان جاقسى ىستەردەن دە جاماندىق ىزدەپ، مانقۇرتتىق تانىتادى. ءبىز ولاردى تاربيەلەپ، تارتىپكە شاقىرۋعا تىرىسامىز»، — دەدى سادىر جاپاروۆ قىرعىز تىلىنەن اۋدارعاندا.
ول كىمدەردى ناقتى ايتىپ وتىرعانىن جانە قانداي شارالاردى كوزدەپ وتىرعانىن پرەزيدەنت ناقتىلامادى.
كەيىنىرەك سول سوزىندە سادىر جاپاروۆ قىرعىز رەسپۋبليكاسىنان تىس جەردە ونداعان جىل بويى تۇرىپ، ەڭبەك ەتىپ جۇرگەن وتانداستارىنا ءسوز ارنادى. ول تۋعان جەردەن جىراقتا ولاردىڭ قۇندىلىعى مەن ەلىنە دەگەن سۇيىسپەنشىلىگى ەرەكشە سەزىلەتىنىن اتاپ ءوتتى.