دۇنيەجۇزىلىك تاماقتانۋ راسيونىن تۇبەگەيلى وزگەرتۋ مال شارۋاشىلىعى كولەمىن ايتارلىقتاي ازايتىپ، جەردى بوساتىپ، جەر پايدالانۋعا بايلانىستى CO₂ شىعارىندىلارىن 2050 جىلعا قاراي 85%-عا تومەندەتۋى مۇمكىن، دەپ حابارلايدى infohub.kz سايتى.
لوندون گيگيەنا جانە تروپيكالىق مەديسينا مەكتەبىنىڭ عالىمدارى كورنەلل ۋنيۆەرسيتەتىمەن بىرلەسىپ، Nature جۋرنالىندا الەمدىك ازىق-ت ۇلىك جۇيەسىن مودەلدەۋ ناتيجەلەرىن جاريالادى. زەرتتەۋ EAT-Lancet 2025 جىلعى كوميسسياسىنىڭ ۇسىنىمدارىنا سۇيەنەدى.
ەسەپتەۋلەرگە سايكەس، جەر شارى حالقىنىڭ سالاۋاتتى تاماقتانۋ راسيونىنا كوشۋى 2050 جىلعا قاراي اۋىل شارۋاشىلىعى جەرلەرىن پايدالانۋدى 6%-عا ازايتادى. سونىمەن قاتار مال شارۋاشىلىعى ونىمدەرىنىڭ قۇنى 42%-عا (630 ملرد دوللار) تومەندەيدى. كۇيىس قايىراتىن مالداردىڭ (ءىرى قارا، قوي، ەشكى) سانى 400 ملن باسقا ازايۋى مۇمكىن.
سونىمەن بىرگە كوكونىس، جەمىس، جاڭعاق جانە بۇرشاق داقىلدارىنىڭ ءوندىرىس كولەمى 57%-عا (890 ملرد دوللار) ارتادى. زەرتتەۋدىڭ جەتەكشى اۆتورى مەتت گيبسون مۇنداي وزگەرىستەر ۇكىمەتتەردەن باتىل قادامدار مەن اگرارلىق سەكتوردى قايتا قۇرۋعا دايىن بولۋدى تالاپ ەتەتىنىن اتاپ ءوتتى.
وڭىرلىك تالداۋ رەفورمانىڭ ءارتۇرلى اسەرىن كورسەتتى: اقش-تا اۋىل شارۋاشىلىعى ءوندىرىسىنىڭ قۇنى 21%-عا، ەۋروپادا 35%-عا تومەندەيدى، ال ءۇندىستاندا بۇل كورسەتكىش وسىمدىك شارۋاشىلىعىنىڭ دامۋى ەسەبىنەن 46%-عا وسەدى.