قازاقستاندا قۇرىلىس سالاسىنداعى جەكە كاسىپكەرلەردىڭ سانى ازايىپ كەلەدى. نارىق قاتىسۋشىلارىنىڭ دەرەگىنشە، ءبىر جىلدا ولاردىڭ سانى شامامەن 11%-عا قىسقارعان، دەپ حابارلايدى infohub.kz سايتى.
سالا وكىلدەرى بۇل ءۇردىستى سالىق زاڭناماسىنداعى وزگەرىستەرمەن بايلانىستىرادى. ءىرى قۇرىلىس كومپانيالارىنا وڭايلاتىلعان سالىق رەجيمىندە جۇمىس ىستەيتىن مەردىگەرلەردى تارتۋ ءتيىمسىز بولىپ قالدى. بۇل سىرلاۋشىلار، ارلەۋشىلەر جانە باسقا دا شاعىن مەردىگەرلەرگە قاتىستى. بۇرىن ولار ءىرى قۇرىلىس كومپانيالارىمەن جەكە كاسىپكەر رەتىندە جۇمىس ىستەي الاتىن.
جىل باسىنان بەرى مۇنداي ىنتىماقتاستىقتىڭ شارتتارى وزگەردى. قۇرىلىس سالۋشىلار كورپوراتيۆتىك تابىس سالىعىن ەسەپتەۋ كەزىندە وڭايلاتىلعان رەجيمدەگى مەردىگەرلەردىڭ قىزمەتىنە جۇمسالعان شىعىنداردى بۇرىنعى كولەمدە ەسەپكە الا المايدى. قازاقستان رەسپۋبليكاسى قۇرىلىسشىلار وداعى پرەزيدەنتىنىڭ ورىنباسارى ۆياچەسلاۆ لازارەۆتىڭ باعالاۋىنشا، قۇرىلىس كومپانيالارىنىڭ قۇرىلىمىندا وڭايلاتىلعان رەجيمدە جۇمىس ىستەيتىن مەردىگەرلەردىڭ ۇلەسى 15%-دان 50%-عا دەيىن بولۋى مۇمكىن.
«وڭايلاتىلعان رەجيمدە جۇمىس ىستەگەندەر قۇرىلىس كومپانيالارىنىڭ قۇرىلىمىندا 15-تەن 50%-عا دەيىن بولۋى مۇمكىن. ەگەر وسىنداي جك 30% بولسا، وندا جۇمىستاردىڭ جالپى قىمباتتاۋى 10%، وعان قوسا ققس ەسەبىنەن تاعى 4%. بارلىعى – سالىق كودەكسىندەگى وزگەرىستەردىڭ ەسەبىنەن عانا كەمىندە 10-15% قىمباتتاۋ»، – دەدى لازاريەۆ.
وسىلايشا، سالا وكىلىنىڭ باعالاۋىنشا، سالىق وزگەرىستەرى قۇرىلىس جۇمىستارىنىڭ قۇنىن 10-15%-عا ارتتىرۋى مۇمكىن. قوسىمشا شىعىندار اقىر سوڭىندا شارشى مەتر قۇنىنا دا اسەر ەتۋى ىقتيمال.
نارىق قاتىسۋشىلارى ماسەلەنى شەشۋدىڭ ءبىر جولى رەتىندە قۇرىلىس سالاسىندا جۇمىس ىستەيتىن جەكە كاسىپكەرلەر ءۇشىن جەكە ارنايى سالىق رەجيمىن ەنگىزۋدى اتايدى.
مۇنداي تەتىك شاعىن بيزنەسكە ءىرى قۇرىلىس كومپانيالارىمەن جۇمىستى جالعاستىرۋعا، ال قۇرىلىس سالۋشىلارعا كورپوراتيۆتىك تابىس سالىعىن ەسەپتەۋ كەزىندە ءتيىستى شىعىنداردى ەسەپكە الۋعا مۇمكىندىك بەرەدى دەپ كۇتىلۋدە. الايدا جىلجىمايتىن م ۇلىك جونىندەگى ساراپشى الەكساندر پاك مۇنداي شارا وزدىگىنەن تۇرعىن ءۇي قۇنىنىڭ تومەندەۋىنە اكەلەدى دەپ كۇماندانادى.
«بۇل، ارينە، بيزنەسكە سالىق جۇكتەمەسىن ازايتادى، ءبىراق ونداعى وسى شەگەرىمدەردىڭ ۇلەسى از. ايتالىق، وسى سالىق رەجيمى ەنگىزىلىپ، قۇرىلىس سالۋشى بۇل شىعىنداردى شەگەرە السا دا، بۇل شارشى مەتر قۇنىنىڭ تومەندەۋىنە اكەلمەيدى»، – دەپ اتاپ ءوتتى ساراپشى.
سونىمەن قاتار، ونىڭ باعالاۋىنشا، سالىق شارتتارىنىڭ وزگەرۋى قۇرىلىس سالۋشىلاردىڭ ودان ءارى شىعىندارىنىڭ ءوسۋىن تەجەۋى مۇمكىن.
قازاقستاندا تۇرعىن ءۇي قۇنى وسى ۋاقىتتا ءوسۋىن جالعاستىرۋدا. تەلەارنا كەلتىرگەن دەرەكتەرگە سايكەس، جىل باسىنان بەرى شارشى مەتردىڭ ورتاشا باعاسى 13%-دان استام وسكەن. ساراپشىلار ينفلياسياعا ىلەسە وتىرىپ، جىل سوڭىنا دەيىن باعانىڭ ودان ءارى ءوسۋىن كۇتۋدە.