بۇگىن سامارا وبلىسىنداعى Ozon لوگيستيكالىق ورتالىعى ۇشقىشسىز ۇشاقتاردىڭ شابۋىلىنا ۇشىرادى. سالدارىنان قويمادا ءورت شىقتى، دەپ حابارلايدى infohub.kz سايتى.
Ozon كومپانياسىنىڭ رەسمي مالىمدەمەسىندە ايتىلعانداي، بارلىق جۇيە قالىپتى رەجيمدە جۇمىس ىستەپ، بىرنەشە مينۋت ىشىندە 500-دەن استام قىزمەتكەر ەۆاكۋاسيالاندى. «دەگەنمەن، وكىنىشكە قاراي، زارداپ شەككەندەر بار. ءبىز ولارعا بارلىق قاجەتتى قولداۋدى مىندەتتى تۇردە كورسەتەمىز»، — دەپ اتاپ ءوتتى كومپانيادا.
وقيعا ورنىندا قۇتقارۋ قىزمەتتەرى جۇمىس ىستەپ، جەدەل جاردەم كولىكتەرى كەزەكشىلىك ەتۋدە. قويما جۇمىسى بەلگىسىز مەرزىمگە توقتاتىلدى. كەلتىرىلگەن زالالدىڭ كولەمى باعالانۋدا.
شابۋىل تۋرالى اقپاراتتى ۋكراينا پرەزيدەنتى ۆلاديمير زەلەنسكي راستاپ، ءوزىنىڭ Instagram پاراقشاسىندا وقيعا ورنىنان بەينەجازبا جاريالادى. «سوڭعى 24 ساعاتتا ءبىزدىڭ اسكەرلەر مايدان شەبىنەن 1000 شاقىرىم قاشىقتىقتا ورنالاسقان نوۆوكۋيبىشيەۆ مۇناي وڭدەۋ زاۋىتىنا سوققى بەرىپ، رەسەي ارمياسىن ميلليونداعان دوللار ەكسپورتتىق كىرىستەن ايىردى. سونداي-اق سامارا وبلىسىنداعى لوگيستيكالىق ورتالىققا جانە قارا تەڭىزدەگى نىساندارعا سوققى جاسادىق»، — دەپ جازدى ول.
ەسكە سالايىق، 18 شىلدەگە قاراعان ءتۇنى ۋكراين ۇشقىشسىز ۇشاقتارى رەسەيلىك Wildberries ماركەتپلەيسىنىڭ تامبوۆ وبلىسى مەن ماسكەۋ تۇبىندەگى ەكى ءىرى لوگيستيكالىق ورتالىعىنا شابۋىل جاسادى. وسىدان كەيىن كومپانيانىڭ كراسنودار جانە ستاۆروپول ولكەلەرىندەگى، سانكت-پەتەربۋرگتەگى، لەنينگراد وبلىسىنداعى جانە قىرىمداعى نىساندارى دا شابۋىلعا ۇشىرادى.