قازاقستاندا ءوزىن-وزى جۇمىسپەن قامتىعانداردىڭ قۇقىقتىق مارتەبەسىن وزگەرتۋ مۇمكىندىگى تالقىلانۋدا. ولاردى رەسمي تۇردە كاسىپكەرلىك سۋبەكتىلەرىنە جاتقىزۋى مۇمكىن. بۇل ماسەلە پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك ءجۇمانعاريننىڭ توراعالىعىمەن وتكەن جاڭا سالىق كودەكسىن ەنگىزۋ جونىندەگى جوبالاۋ كەڭسەسىنىڭ وتىرىسىندا قارالدى، دەپ حابارلايدى infohub.kz سايتى.
ءقازىر ءوزىن-وزى جۇمىسپەن قامتىعاندار كاسىپكەرلىك سۋبەكتىسى بولىپ سانالمايدى. الايدا بيلىك بۇل ماسەلەنى قوسىمشا زەردەلەۋدى كوزدەيدى، ويتكەنى جاڭا سالىق رەجيمى ونداعان مىڭ ادامدى تارتىپ ۇلگەردى. قولدانىستاعى زاڭناما بويىنشا ءوزىن-وزى جۇمىسپەن قامتىعاندار كاسىپكەرلەر قاتارىنا جاتپايدى، بۇل سالىق، كاسىپكەرلىك جانە الەۋمەتتىك كودەكستەر اراسىندا قۇقىقتىق قايشىلىق تۋدىرادى. سونىمەن قاتار، شاعىن جانە ورتا بيزنەستىڭ رەسمي ستاتيستيكاسى بۇل ساناتتاعى ازاماتتاردى ەسەپكە المايدى.
جاڭا سالىق كودەكسىنە سايكەس، ارنايى سالىق رەجيمىن جەكە كاسىپكەر رەتىندە تىركەلمەگەن، رۇقسات ەتىلگەن قىزمەت تۇرلەرىمەن اينالىساتىن، جالدامالى جۇمىس كۇشىن پايدالانبايتىن جانە ايىنا 300 ايلىق ەسەپتىك كورسەتكىشتەن اسپايتىن تابىسى بار جەكە تۇلعالار پايدالانا الادى. رەجيم اياسىندا ولار 4% ستاۆكا بويىنشا تەك الەۋمەتتىك تولەمدەردى عانا تولەيدى.
مەملەكەتتىك كىرىستەر كوميتەتىنىڭ دەرەگىنشە، جىل باسىنان بەرى ءوزىن-وزى جۇمىسپەن قامتىعان رەتىندە 688،8 مىڭ ادام تىركەلگەن. ونىڭ باسىم كوپشىلىگى – 597 مىڭى نەمەسە 87% – «ياندەكس»، InDrive جانە Wolt سياقتى سيفرلىق پلاتفورمالار ارقىلى جۇمىس ىستەيدى. تاعى 91،5 مىڭ ادام دەربەس قىزمەت اتقارادى. جاڭادان تىركەلگەندەردىڭ از عانا بولىگى بۇرىن كاسىپكەر بولعان: 84،2 مىڭى بۇرىن جەكە كاسىپكەر مارتەبەسىنە يە بولسا، قالعان 546،4 مىڭ ادام بۇرىن كاسىپكەر رەتىندە ەشقاشان تىركەلمەگەن. وسىلايشا، جارتى ميلليوننان استام قازاقستاندىق العاش رەت رەسمي جۇمىسپەن قامتۋ جانە سالىق سالۋ جۇيەسىنە ەندى.
وتىرىسقا قاتىسۋشىلار ءوزىن-وزى جۇمىسپەن قامتۋدىڭ ەكونوميكالىق قىزمەتتىڭ دەربەس نىسانىنا، كاسىپكەرلىككە ءوتۋدىڭ ارالىق كەزەڭىنە نەمەسە جەكە جۇمىسپەن قامتۋ ساناتىنا اينالاتىنىن انىقتاۋ كەرەكتىگىن اتاپ ءوتتى. قابىلدانعان شەشىمگە بايلانىستى كاسىپكەرلىك جانە الەۋمەتتىك كودەكستەرگە وزگەرىستەر ەنگىزىلەتىن بولادى. تالقىلاۋ قورىتىندىسى بويىنشا بيلىك ازىرگە بۇل كودەكستەردە ءوزىن-وزى جۇمىسپەن قامتىعانداردىڭ مارتەبەسىن بەكىتپەۋگە شەشىم قابىلدادى. بۇل ماسەلەگە كەلەسى جىلى، جاڭا سالىق رەجيمىن قولدانۋ تاجىريبەسى جيناقتالعان كەزدە قايتا ورالۋ جوسپارلانۋدا.