رەسەيلىك «تاتنەفت» كومپانياسى شىعىپ كەتكەننەن كەيىن «سامۇرىق-قازىنا» قۇرىلىمدارىنىڭ تولىق باقىلاۋىنا وتكەن «بۋتاديەن» كومپانياسى AIX (Astana International Exchange) بيرجاسىندا وبليگاسيالار شىعارۋ ارقىلى 543،5 ملن يۋان (شامامەن 80 ملن دوللار) تارتپاق. بۇل تۋرالى infohub.kz سايتى حابارلايدى.
بۇعان ەكونوميست ءارى Finmentor.kz Telegram-ارناسىنىڭ اۆتورى ارمان باتايەۆ نازار اۋداردى.
AIX-تە جاريالانعان مالىمەت بويىنشا، كومپانيا جىلدىق كۋپوندىق مولشەرلەمەسى 4،5% بولاتىن ءبىر جىلدىق وبليگاسيالار شىعارادى.
قازىرگى ۋاقىتتا كومپانيانىڭ 99،999% ۇلەسى «سامۇرىق-قازىنا» قورىنىڭ ەنشىلەس كاسىپورنى – Samruk-Kazyna Ondeu-گە تيەسىلى. قالعان 0،001% SSAP (ستەپنوگورسك كۇكىرت قىشقىلى زاۋىتى) يەلىگىندە. بۇل – Samruk-Kazyna Ondeu مەن «قازاتومونەركاسىپتىڭ» بىرلەسكەن كاسىپورنى.
2026 جىلعى اقپانعا دەيىن جوبانىڭ 75% رەسەيلىك «تاتنەفتكە» تيەسىلى بولدى. ول جوبادان شىققان سوڭ، «سامۇرىق-قازىنا» زاۋىتتى ءوز بەتىنشە سالۋدى جالعاستىرۋدا.
«بۋتاديەن» اتىراۋ وبلىسىنداعى «ۇلتتىق يندۋستريالىق مۇناي-حيميالىق تەحنوپارك» ارنايى ەكونوميكالىق ايماعىندا قۇنى 1،1 ملرد دوللار بولاتىن بۋتاديەن ءوندىرۋ زاۋىتىن سالۋدا. ىسكە قوسىلعاننان كەيىن كاسىپورىن جىلىنا 300 مىڭ تونناعا دەيىن ءونىم شىعارا الادى.