ورتاعاسىرلىق بيلەۋشى پاتشا ءسامۋيلدىڭ سۇيەگى وتىز جىلعا سوزىلعان كەلىسسوزدەردەن كەيىن سەنبى كۇنى بولگارياعا سالتاناتتى تۇردە جەتكىزىلدى. 60 جىل بۇرىن گرەكيانىڭ شەكارا ماڭىنان تابىلعان سۇيەك اسكەري ۇشاقپەن بولگاريا استاناسى سوفياعا اكەلىنىپ، مەملەكەتتىك دەڭگەيدەگى قۇرمەتپەن قارسى الىندى: قۋعىنشى ۇشاق سۇيەمەلدەۋى، 21 رەت زەڭبىرەكتەن اتۋ جانە اۋليە سوفيا شىركەۋىنە دەيىنگى شەرۋ ۇيىمداستىرىلدى. حالىق شىركەۋدە مارقۇمعا قۇرمەت كورسەتە الادى، دەپ حابارلايدى infohub.kz سايتى.
گرەكيا پرەمەر-مينيسترى كيرياكوس ميسوتاكيس بۇل تابىستاۋ افينانىڭ ۇلىبريتانيانى پارفەنون مۇسىندەرىن قايتارۋعا كوندىرۋ ناۋقانىنا سەرپىن بەرەتىنىن ايتتى. ول 2 500 جىلدىق افينا اكروپولىنەن الىنىپ، بريتان مۇراجايىندا ساقتالعان مۇسىندەر توپتاماسىن مەڭزەپ وتىر.
«الەم قاۋىمداستىعى مادەني مۇرانى قورعاۋ جونىندەگى ۇزاق جىلعى ۇستانىمىن قايتا قاراپ جاتىر. بۇل وزگەرىس بۇگىنگى باستامادا كورىنىس تاپتى. ونىڭ نەگىزىندە ەسكەرتكىشتەر مەن تاريحي جادىگەرلەردى سوعىس ولجاسى رەتىندە دە، ولار جاسالعاننان كەيىنگى جاعدايلاردىڭ ناتيجەسى رەتىندە دە قاراۋعا بولمايدى دەگەن ايقىن قاعيدات جاتىر»، — دەدى ميسوتاكيس.
سامۋيل — ۆيزانتيا يمپەرياسىمەن كۇرەسىپ، ءوز پاتشالىعىن كەڭەيتۋگە ۇمتىلعان جاۋىنگەر بيلەۋشى. الايدا ول جەڭىلىسكە ۇشىراپ، كوپ ۇزاماي 1014 جىلى قايتىس بولدى. ول بولگاريانىڭ ۇلتتىق بىرەگەيلىگىنىڭ سيمۆولى سانالادى.
سۇيەكتى تابىستاۋ وسى اپتانىڭ باسىندا ەكى ەلدىڭ مادەنيەت مينيسترلەرى قول جەتكىزگەن كەلىسىمگە سايكەس جۇزەگە استى. كەلىسىم بويىنشا بولگاريا ءبىرىنشى دۇنيەجۇزىلىك سوعىس كەزىندە گرەك موناستىرلارىنان الىنعان ءدىني جادىگەرلەردى قايتارادى.
ءبىرقاتار تانىمال گرەك عالىمدارى مەن ءدىني قايراتكەرلەر بولگاريانىڭ ۇلەسى جەتكىلىكسىز دەپ الاڭداۋشىلىق ءبىلدىردى.
ميسوتاكيس پەن بولگاريا پرەزيدەنتى رۋمەن راديەۆ تابىستاۋ الدىندا سالونيكيدەگى ۆيزانتيا وركەنيەتى مۇراجايىندا وتكەن سالتاناتقا قاتىستى. سۇيەك وسى مۇراجايدا ساقتالعان بولاتىن.
«بۇل — ەكى حالىققا دا تيەسىلى جادىگەرلەر. ولار — ءبىزدىڭ جادىمىز بەن بايلانىسىمىز. وتانداستارىمىز بەن كەلەر ۇرپاق اتا-بابالارىنا قۇرمەت كورسەتۋگە لايىق ءارى مۇمكىندىگى بولۋى ءتيىس»، — دەدى راديەۆ مۇراجايدا وتكەن سالتاناتتا سويلەگەن سوزىندە.
«ەگەر بۇرىن پاتشا سامۋيل ءبىزدى بولسە، بۇگىن ول ءبىزدى بىرىكتىرەدى دەپ ايتا الامىن. ول ءبىزدىڭ ستراتەگيالىق ىنتىماقتاستىعىمىزدى نىعايتىپ، مەملەكەتتەر مەن حالىقتار اراسىنداعى تاريحي قارىم-قاتىناستى ودان ءارى بەرىك ەتەدى»، — دەدى راديەۆ.