سۇلتان سارسەماليەۆتىڭ بەس كامەلەتكە تولماعان بالاسى اتا-انا قامقورلىعىنسىز قالدى. ونىڭ اكەسى بۇكىل وتباسىن ولتىرگەنى ءۇشىن ءومىر بويى باس بوستاندىعىنان ايىرىلدى. سوت بالالاردىڭ تاعدىرى تۋرالى جەكە قاۋلى شىعاردى، دەپ حابارلايدى infohub.kz.
ءىستى قاراعان سۋديا زارەما حاميدۋللينا سوتتالۋشىنىڭ بەس كامەلەتكە تولماعان بالاسىنىڭ تاعدىرىنا قاتىستى جەكە قاۋلى شىعارىلعانىن مالىمدەدى. سوت شەشىمىنە سايكەس، بالالاردىڭ قۇقىعىن قورعاۋ جانە ولاردى ورنالاستىرۋ ماسەلەلەرى جاۋاپتى ورگاندارعا جۇكتەلدى.
«سوت بالالاردى كۇتۋ جانە ورنالاستىرۋ ماسەلەسىن اتىراۋ وبلىسى ءبىلىم باسقارماسىنا تاپسىردى. سونىمەن قاتار، قىزىلقوعا اۋدانىنىڭ اكىمدىگىنە جانگەلدين اۋىلىنداعى قازا بولعانداردان قالعان ءۇيدىڭ مۇراگەرلىك قۇقىعىن رەسىمدەۋ تاپسىرىلدى»، — دەدى سۋديا زارەما حاميدۋللينا.
سۇلتان سارسەماليەۆتىڭ كەنجە بالاسى 2025 جىلى دۇنيەگە كەلگەن. اعىمداعى جىلدىڭ 3 اقپانىندا اۋداندىق كامەلەتكە تولماعاندار ىستەرى جانە ولاردىڭ قۇقىعىن قورعاۋ جونىندەگى كوميسسيا بالالاردى مەملەكەت قامقورلىعىنا بەرۋ تۋرالى شەشىم قابىلدادى. بۇعان دەيىن ولاردى سوتتالۋشىنىڭ اناسى كۇتىپ-باققان. العاشىندا ءۇش ۇلكەن بالا كامەلەتكە تولماعاندار بەيىمدەۋ ورتالىعىنا، ال ەكى كىشىسى بالالار ۇيىنە جىبەرىلگەن. كەيىن اتىراۋداعى بەيىمدەۋ ورتالىعىندا 3 پەن 9 جاس ارالىعىنداعى ءتورت بالا تاربيەلەنىپ جاتقانى، ال ەڭ كىشكەنتاي بالا مامانداندىرىلعان مەكەمەدە ەكەنى انىقتالدى.