الماتى اكىمى دارحان ساتىبالدى جىلىتۋ ماۋسىمى قارساڭىندا قالانىڭ نەگىزگى جىلۋ بەرۋ نىساندارىن ارالاپ شىقتى. تەكسەرۋ بارىسىندا وڭتۇستىك اۋداندىق قازاندىعى، «وربيتا» قازاندىعى جانە اۋەزوۆ اۋدانىنداعى جىلۋ جەلىلەرىن قايتا جاڭعىرتۋ ۋچاسكەسى قارالدى، دەپ حابارلايدى infohub.kz سايتى.
العاشقى نىسان — حودجانوۆ كوشەسىندەگى وڭتۇستىك اۋداندىق قازاندىعى. ول 1553 نىساندى، ونىڭ ىشىندە 356 كوپپاتەرلى ءۇي مەن 16 ءبىلىم نىسانىن جىلۋمەن قامتاماسىز ەتەدى. قايتا جاڭعىرتۋ اياسىندا مۇندا ءۇش قازاندىق اۋىستىرىلىپ، تاعى بىرەۋى جاڭارتىلدى، سونداي-اق قوسالقى جابدىقتار جاڭارتىلدى. جوبانى ىسكە اسىرۋ قازاندىقتىڭ قۋاتىن 55 گكال/ساعاتقا ارتتىرىپ، 200 مىڭعا جۋىق تۇتىنۋشىنىڭ جىلۋمەن قامتاماسىز ەتىلۋ سەنىمدىلىگىن كوتەرەدى.
سودان كەيىن دارحان ساتىبالدى 1973 جىلدان بەرى جۇمىس ىستەپ كەلە جاتقان «وربيتا» اۋداندىق قازاندىعىن ارالادى. نىسانعا 1312 نىسان قوسىلعان، ونىڭ ىشىندە 925 كوپپاتەرلى ءۇي، 39 ءبىلىم نىسانى جانە 17 دەنساۋلىق ساقتاۋ نىسانى بار. 2026 جىلى مۇندا جوندەۋ جۇمىستارى جۇرگىزىلدى.
«باستى مىندەت — ەڭ جوعارى جۇكتەمە كەزەڭىندە تۇرعىنداردى تۇراقتى جىلۋمەن قامتاماسىز ەتۋ. توزۋ دەڭگەيى جوعارى نىسانداردى كەزەڭ-كەزەڭىمەن جاڭعىرتىپ، بارلىق جۇمىستى ساپالى جانە بەلگىلەنگەن مەرزىمدە جۇرگىزۋ قاجەت»، — دەدى دارحان ساتىبالدى.
ارالاۋدىڭ قورىتىندى نۇكتەسى ساين — مومىش ۇلى — ۋلۋگبەك — اباي كوشەلەرىنىڭ كۆادراتىنداعى جىلۋ جەلىلەرىن قايتا جاڭعىرتۋ ۋچاسكەسى بولدى. جىلۋ تراسساسى 1988 جىلدان بەرى پايدالانىلىپ كەلەدى جانە نورماتيۆتىك مەرزىمىن تاۋىسقان، سوڭعى ءۇش جىلدا مۇندا 10 زاقىمدانۋ تىركەلگەن. ءقازىر نىساننىڭ دايىندىعى 80%-دى قۇرايدى، بيىل شامامەن 120 مەتر جىلۋ جەلىسى اۋىستىرىلدى. قايتا جاڭعىرتۋ اياقتالعان سوڭ 45 كوپپاتەرلى ءۇيدىڭ، 15 باسقا نىساننىڭ جانە ءبىر بالاباقشانىڭ جىلۋمەن قامتاماسىز ەتىلۋ سەنىمدىلىگى ارتادى.
نىساندا تۇرعىندارمەن كەزدەسۋ دە ءوتتى. قالا تۇرعىندارى قالالىق ينفراقۇرىلىمعا قاتىستى ماسەلەلەر مەن ۇسىنىستارىن جەتكىزدى. كەزدەسۋ قورىتىندىسى بويىنشا بەيىندى قىزمەتتەرگە ءتيىستى تاپسىرمالار بەرىلدى.
جالپى، 2026 جىلى الماتىدا 20،1 كم جىلۋ جەلىسىن قايتا جاڭعىرتۋ جانە جوندەۋ جۇمىستارى جۇرگىزىلۋدە، ونىڭ 15،8 كم-ى ورىندالدى.