ساۋد ارابياسىنىڭ اۋە قورعانىس كۇشتەرى سەيسەنبى كۇنى مەككەنىڭ وڭتۇستىگىندە حۋسيتتەردىڭ ۇشقىشسىز ۇشۋ اپپاراتىن اتىپ ءتۇسىردى. درون قاسيەتتى قالا ۇستىندەگى تىيىم سالىنعان اۋە كەڭىستىگىنە كىرە المادى. بۇل تۋرالى يەمەندە يران قولدايتىن توپقا قارسى سوعىسىپ جاتقان ساۋد ارابياسى باستاعان اسكەري كواليسيانىڭ وكىلى مالىمدەدى، دەپ حابارلايدى infohub.kz سايتى.
كواليسيا وكىلى تۇركي ال-مالكي سارسەنبىگە قاراعان ءتۇنى يسلامنىڭ ەكى قاسيەتتى ورنى مەن قاجىلاردىڭ قاۋىپسىزدىگى « قىزىل سىزىق» ەكەنىن ايتتى. ونىڭ ايتۋىنشا، كواليسيا حۋسيتتەرگە قارسى قاجەتتى تەجەۋ شارالارىن قولدانادى.
مەككە — بۇكىل الەمدەگى مۇسىلماندار ءۇشىن قاسيەتتى عيباداتحانالار ورنالاسقان يسلامنىڭ ەڭ قاسيەتتى قالاسى ءارى جىل سايىن ميلليونداعان مۇسىلمان اتقاراتىن يسلامنىڭ بەس پارىزىنىڭ ءبىرى — قاجىلىقتىڭ باستى ورتالىعى.
مالكي بۇل وقيعانى حۋسيتتەردىڭ مەككەگە جاساعان ەكىنشى ارەكەتى دەپ سيپاتتادى. كواليسيانىڭ مالىمدەۋىنشە، بۇعان دەيىن 2017 جىلدىڭ شىلدەسىندە بالليستيكالىق زىمىران ۇشىرىلعان بولاتىن.
حۋسيتتەردىڭ وكىلى سارسەنبى كۇنى بۇل تۇجىرىمدى جوققا شىعاردى. توپ وكىلى حازەم ءال-اساد الەۋمەتتىك جەلىدەگى پاراقشاسىندا: «مەككەگە نىسانا كوزدەلدى دەگەن تۇجىرىم — بۇرىن دا قولدانىلعان، ەندى ەشكىمدى الدامايتىن ەسكىرگەن وتىرىك»، — دەپ جازدى.
يسلام ىنتىماقتاستىق ۇيىمى يسلامنىڭ قاسيەتتى قالاسىنا جاسالعان شابۋىلدى «سۇمدىق» دەپ ايىپتاپ، وعان حۋسيتتەردى كىنالادى. 57 مۇسىلمان باسىم ەلدەن قۇرالعان ۇيىم «ساۋد ارابياسى كورولدىگىنە قارسى جالعاسىپ جاتقان اگرەسسيانى» ايىپتادى.
ساۋد ارابياسى سەيسەنبى كۇنى ەلدىڭ ءبىرقاتار ايماعىندا، سونىڭ ىشىندە مەككە مەن باسقا دا قالالاردا قاۋىپسىزدىك دابىلىن جاريالادى. بۇعان يران قولدايتىن جاۋىنگەرلەردىڭ ءبىر اپتا بويى جاساعان شابۋىلدارى سەبەپ بولدى، ولار كورولدىكتى تاياۋ شىعىس سوعىسىنا تەرەڭىرەك تارتىپ وتىر.
اقش ەلشىلىگى مەككە مەن باسقا ايماقتارداعى دابىلداردان كەيىن ساۋد ارابياسىنا ساپاردى «قايتا قاراۋعا» كەڭەس بەردى. ەسكەرتۋدە «يراننىڭ دروندارى مەن زىمىراندارىنىڭ امەريكاندىق مۇددەلەرگە نىسانا كوزدەۋ ءقاۋپى، قارۋلى قاقتىعىس، تەرروريزم، ەلدەن شىعۋعا تىيىم سالۋ جانە الەۋمەتتىك جەلىدەگى ارەكەتكە قاتىستى جەرگىلىكتى زاڭدار» تۋرالى ايتىلعان. سونداي-اق «تەرروريزم قاۋپىنە بايلانىستى يەمەن شەكاراسىنا بارماڭىز» دەپ ەسكەرتىلگەن.
حۋسيتتەر يەمەننىڭ قىزىل تەڭىز جاعالاۋىنىڭ ءبىر بولىگىن، الەمدەگى ەڭ ماڭىزدى كەمە جۇرەتىن بۇعازداردىڭ ءبىرى — باب ءال-ماندابقا قاراپ تۇرعان اۋماقتى باقىلاۋعا الدى. بۇل ورمۋز بۇعازىنان باعىت وزگەرتكەن ساۋد مۇنايىنىڭ ەكسپورتىنا ءقاۋىپ توندىرەدى.
توپ سوڭعى ءبىر اپتادا ساۋد ارابياسىنا بىرنەشە ءىرى شابۋىل جاساعانىن حابارلادى. ونىڭ ىشىندە دۇيسەنبىدە اۋە بازاسىنا جاسالعان سوققىلار دا بار. حۋسيتتەر ونى يەمەنگە جاسالعان اۋە سوققىلارىنا قايتارىلعان جاۋاپ دەپ اتادى.
Reuters جانە Agence France-Presse اقپارات اگەنتتىكتەرىنىڭ دەرەكتەرى بويىنشا.