ساۋد ارابياسىنداعى ماڭىزدى مۇناي قۇبىرى وتكەن اپتاداعى سوققىدان قاتتى زاقىمدانعانىن سپۋتنيكتىك سۋرەتتەر كورسەتتى. BBC Verify اگەنتتىگىنە سويلەگەن ساراپشىلاردىڭ ايتۋىنشا، قۇبىردى جوندەۋ ءبىر ايدان استام ۋاقىت الۋى مۇمكىن. بۇل مۇناي باعاسىنىڭ ودان ءارى وسۋىنە اكەلۋى ىقتيمال، دەپ حابارلايدى infohub.kz سايتى.
سۋرەتتە ەڭ اۋىر زاقىم شىعىس—باتىس مۇناي قۇبىرى بويىنداعى سورعى ستانسياسىندا ەكەنى كورىنەدى. ساۋد ارابياسى شيكى مۇنايدى ورمۋز بۇعازى ارقىلى ەمەس، قىزىل تەڭىز ارقىلى ەكسپورتتاۋعا سوڭعى كەزدە كوبىرەك سۇيەنىپ كەلەدى. ال ورمۋز بۇعازىندا التى ايعا سوزىلعان سوعىس بارىسىندا يران مەن اقش كەمەلەرگە شابۋىل جاساعان.
ساۋد ارابياسى ۇكىمەتى قۇبىرعا جاسالعان سوققىنى يراكتاعى يران قولدايتىن ميليسيالارعا تاڭدى. بۇعان دەيىن يران قولدايتىن يەمەننىڭ حۋسيت توبى ەلدىڭ وڭتۇستىك-باتىسىنا بىرنەشە كۇن بويى زىمىران مەن درونمەن شابۋىل جاساعان. ساۋد ارابياسى جاۋاپ رەتىندە يەمەننىڭ باتىسىنداعى حۋسيتتەر باقىلايتىن اۋداندارعا سوققى بەردى.
جاڭا سپۋتنيكتىك سۋرەتتەر وتكەن اپتاداعى حۋسيتتەردىڭ سوققىسىنان كەيىن ساۋد ارابياسىنىڭ حاليد پاتشا اتىنداعى اۋە بازاسىنىڭ دا زاقىمدانعانىن كورسەتەدى.
ساۋد ارابياسى ۇكىمەتى سەيسەنبىدە حۋسيتتەردىڭ شابۋىلدارىنا «قاتاڭ» جاۋاپ بەرەتىنىن مالىمدەدى.
حۋسيتتەر ساۋد ارابياسى قولدايتىن يەمەننىڭ ۇكىمەت جاقتاس كۇشتەرىنە قارسى ۇزاققا سوزىلعان ازاماتتىق سوعىس جۇرگىزىپ كەلەدى. سوڭعى اپتالاردا توپ شابۋىل ناۋقانىن كۇشەيتتى.
وتكەن اپتادا حۋسيتتەر يەمەننىڭ وڭتۇستىك-باتىس جاعالاۋىنداعى ءبىرقاتار جاڭا اۋماقتى باقىلاۋعا الدى. ونىڭ ىشىندە ماڭىزدى باب ءال-مانداب بۇعازىنا قارايتىن اۋداندار بار. بۇل ولاردىڭ ساۋد ارابياسىنىڭ كەمە قاتىناسىنا جاريالاعان بلوكاداسىن جۇزەگە اسىرۋ مۇمكىندىگىن كۇشەيتەدى.