پەنسيلۆانيا ۋنيۆەرسيتەتىنىڭ عالىمدارى باس پەن مويىن وبىرىنا بايلانىستى ءقاۋىپتى ۆيرۋستار مەن باكتەريالاردى جويا الاتىن بيوينجەنەرلىك ساعىز جاساپ شىعاردى، دەپ حابارلايدى infohub.kz.
پەنسيلۆانيا ۋنيۆەرسيتەتىنىڭ ستوماتولوگيالىق مەديسينا مەكتەبىنىڭ پروفەسسورى گەنري دانيەلل باستاعان زەرتتەۋ توبى گياسينت بۇرشاقتارى نەگىزىندە ءونىم جاسادى. ساعىز قۇرامىنا تابيعي ۆيرۋسقا قارسى FRIL اقۋىزى كىرەدى، ول باس پەن مويىننىڭ جالپاق جاسۋشالى وبىرىن (HNSCC) تۋدىراتىن ميكروورگانيزمدەرمەن كۇرەسەدى.
زەرتحانالىق سىناقتار كەزىندە پاسيەنتتەردىڭ سىلەكەيى مەن اۋىز قۋىسىنىڭ شايۋ سۇيىقتىعى ۇلگىلەرىندە ساعىز سىعىندىسى ادام پاپيللوما ۆيرۋسىنىڭ (اپۆ) دەڭگەيىن تيىسىنشە 93% جانە 80% تومەندەتكەن. سونىمەن قاتار، عالىمدار ساعىزعا ميكروبقا قارسى پروتەگرين پەپتيدىن قوسىپ، Porphyromonas gingivalis جانە Fusobacterium nucleatum پاتوگەندى باكتەريالارىنىڭ كونسەنتراسياسىن ءىس جۇزىندە نولگە دەيىن ازايتقان.
بۇل رەتتە ءونىم اۋىز قۋىسىنىڭ پايدالى ميكروفلوراسىنا زيان كەلتىرمەيدى. Scientific Reports جۋرنالىندا جاريالانعان زەرتتەۋ اۆتورلارى بۇل ازىرلەمەنى قولجەتىمدى قوسالقى تەراپيا نەمەسە پروفيلاكتيكا قۇرالى رەتىندە قولدانۋعا بولادى دەپ سانايدى.