كانادالىق ءانشى سەلين ديون التى جىلدان كەيىن العاش رەت تولىققاندى جەكە كونسەرتىن پاريجدە بەردى. بۇل ونىڭ ەمدەلمەيتىن اۋرۋى تۋرالى مالىمدەگەننەن كەيىنگى ساحناعا العاشقى شىعۋى بولدى، دەپ حابارلايدى infohub.kz سايتى.
ديون 2022 جىلدىڭ جەلتوقسانىندا ءوزىنىڭ دياگنوزى — بۇلشىقەت قاقساۋ سيندرومى تۋرالى ايتقان بولاتىن. بۇل — سيرەك كەزدەسەتىن اۋتويممۋندى نەۆرولوگيالىق اۋرۋ. ونىڭ ايتۋىنشا، بۇل اۋرۋ ميلليون ادامنىڭ بىرەۋىندە عانا كەزدەسەدى ەكەن. ءانشى كۇن سايىن قوزعالىسىنا كەدەرگى كەلتىرەتىن سپازمدارمەن جانە ءان سالعاندا داۋىس بايلامدارىن تولىق پايدالانا الماۋمەن كۇرەسەتىنىن مويىنداعان.
پاريجدەگى كونسەرت كەزىندە سەلين ديون ەموسياسىن ۇستاي الماي، ساحنادا جىلاپ جىبەردى. «بارلىعىمىزدىڭ بىرگە بولعانىمىز تاڭعاجايىپ. مەن ۋادە بەردىم. قايتا ورالىپ، ساحناعا شىعامىن دەپ ءسوز بەردىم. مىنە، مەن سىزدەر ءۇشىن جانە ءوزىم ءۇشىن ءان سالىپ تۇرمىن. قولداۋلارىڭىز بەن شىدامدىلىقتارىڭىز ءۇشىن مىڭ العىس. مەن قانداي بولسام، سوندايمىن، ويتكەنى سىزدەر مەنى جاقسى كورەسىزدەر»، — دەدى ءانشى.
ديون سوڭعى رەت تولىققاندى كونسەرتىن 2020 جىلى Courage Tour اياسىندا بەرگەن ەدى. 2022 جىلعا جوسپارلانعان تۋرنىڭ سولتۇستىك امەريكا بولىگىن دەنساۋلىعىنا بايلانىستى توقتاتۋعا ءماجبۇر بولدى.
اۋرۋى تۋرالى مالىمدەگەننەن ءبىر جىل وتكەن سوڭ، 2023 جىلدىڭ قاراشاسىندا ءانشى العاش رەت كوپشىلىك الدىنا شىقتى: ونى «مونرەال كاناديەنس» حوككەي كومانداسىنىڭ ماچىندا بالالارىمەن بىرگە كوردى. ال 2024 جىلدىڭ اقپانىندا ديون ءوزىنىڭ مانسابى مەن ەمدەلمەيتىن دەرتىمەن ءومىرى تۋرالى دەرەكتى ءفيلمنىڭ شىعاتىنىن جاريالادى.