سەمەيدىڭ شەتىندەگى ۆودنىي كەنتىندە قاندى قىلمىس بولدى: 19 جاستاعى قىز ءۇيىنىڭ جانىندا پىشاق جاراقاتىنان كوز جۇمدى. كۇدىكتى ۇستالدى، دەپ حابارلايدى infohub.kz سايتى.
كورشىلەر بولعان جاعدايدى كتك تەلەارناسىنا باياندادى. ولاردىڭ ايتۋىنشا، الدىمەن ايقاي ەستىگەن، كەيىن قانعا بويالعان قىزدى كورگەن. جانجال ەكى جاس جىگىتتىڭ اراسىندا بولعان دەگەن بولجام بار.
«مەن اۋلادا ەدىم. ايقاي، شۋ، توبەلەس ەستىدىم. قىز ايقايلادى. كەيىن سىرتقا شىقسام، قىز جەردە جاتىر، ءبارى قان، ءوڭى بوزارىپ كەتكەن. جۇرەك ماسساجىن جاسادى. جىگىتتەر تۇردى. جىلادى»، — دەدى كۋاگەر يرينا لىساك.
جەرگىلىكتى تۇرعىندار جىگىتتىڭ ۇرىس كەزىندە پىشاققا جارماسقانىن ايتادى. كەيبىر دەرەكتەرگە قاراعاندا، ول ولتىرىلگەن قىزدىڭ بۇرىنعى جىگىتى بولعان. كۇدىكتى قىلمىستان كەيىن قاشۋعا تىرىسىپ، ءتىپتى قورشاۋدان سەكىرىپ وتكەن، دەيدى كورشىلەر.
«كەيىن ءبىر جىگىت جۇگىرىپ كەلىپ، كومەك سۇرادى. شىقسام، قىز جاتىر، پىشاقتان جارالانعان. كەيىن جەدەل جاردەم كەلدى، پوليسيا كەلدى، ءبىزدى ۇيگە قايتاردى»، — دەدى جەرگىلىكتى تۇرعىن ازامات كۋجىكەنوۆ.
وقيعا ورنىنا كەلگەن دارىگەرلەر زارداپ شەككەن قىزدى امان الىپ قالا المادى. ول قانشا پىشاق جاراقاتىن العانى ناقتىلانباعان. انىقتالعانداي، ولتىرىلگەن قىز جەرگىلىكتى كوللەدجدىڭ ءۇشىنشى كۋرس ستۋدەنتى بولعان. وقىتۋشىلار قىزدىڭ تاربيەلى ءارى جاقسى وقىعانىن اتاپ ءوتتى. ونىڭ سۋرەتى قۇرمەت تاقتاسىندا ءىلۋلى تۇر. قايعىلى وقيعا بولعان كۇنى تاڭەرتەڭ ول ساباققا كەلگەن.
پوليسيا وقيعانى اسا ۇستامدىلىقپەن ءتۇسىندىردى. كۇدىكتىنىڭ ۇستالعانىن حابارلادى.
«21 قىركۇيەكتە پوليسيا ءولتىرۋ فاكتىسى بويىنشا قىلمىستىق ءىس قوزعادى. كۇدىكتى انىقتالىپ، ءىزىن سۋىتپاي ۇستالدى. ول اۋداننىڭ 24 جاستاعى تۇرعىنى بولىپ شىقتى»، — دەپ ناقتىلادى سەمەي قالالىق پوليسيا باسقارماسى باستىعىنىڭ ورىنباسارى ەرجان اققالييەۆ.
كۇدىكتى ءقازىر وقشاۋلاعىشتا وتىر. پوليسيا قۇربان مەن كۇدىكتىنىڭ تانىس بولعانىن حابارلادى.