سەمەيدە گازوۆوز جارىلىپ، اۆتوكولىك جۋۋ ورنىنىڭ ماڭىندا ءورت شىقتى. زارداپ شەككەن ەكى ادامنىڭ ءبىرى رەانيماسيادا جاتىر. 45 جاستاعى پوليسيا قىزمەتكەرىنىڭ جاعدايى اۋىر، ءبىراق تۇراقتى دەپ باعالانىپ وتىر، دەپ حابارلايدى infohub.kz سايتى.
سەمەي جەدەل مەديسينالىق جاردەم اۋرۋحاناسى بولىمشەسىنىڭ مەڭگەرۋشىسى دارىن باقتىباەۆتىڭ ايتۋىنشا، پوليسەيگە ەكىنشى جانە ءۇشىنشى دارەجەلى كۇيىك دياگنوزى قويىلعان، دەنەسىنىڭ شامامەن 25-30 پايىزى زاقىمدانعان.
«ونىڭ جاعدايى اۋىر، ءبىراق تۇراقتى. ەكىنشى جانە ءۇشىنشى دارەجەلى كۇيىك دياگنوزى قويىلدى، دەنەسىنىڭ شامامەن 25-30 پايىزى زاقىمدانعان. ەكىنشى ناۋقاس حيرۋرگيا بولىمشەسىنە جات قىزىلدى، ونىڭ جاعدايى ورتاشا اۋىر دەپ باعالانىپ وتىر»، — دەپ كەلتىرەدى ونىڭ ءسوزىن «31 ارنا».
ەكىنشى زارداپ شەككەن ادام — گازوۆوز جۇرگىزۋشىسى. ەكى ەر ادام دا وقيعادان كەيىن اۋرۋحاناعا جات قىزىلدى.
جارىلىس 22 قىركۇيەك كۇنى كەشكە سوسنوۆايا كوشەسىندەگى اۆتوكولىك جۋۋ ورنىنىڭ ماڭىندا بولدى. الدىن الا دەرەكتەرگە قاراعاندا، گاز-اۋا قوسپاسى تۇتانىپ، سوڭىنان گازوۆوز جارىلعان. ءورت ءبىر قاباتتى اۆتوكولىك جۋۋ عيماراتىن شارپىپ، كورشىلەس ەكى جەكە ۇيگە تاراعان.
ۇيلەردىڭ ءبىرى تولىعىمەن ورتەنىپ كەتتى. شاتىر قۇلاعان ساتتە ىشىندە ادام بولماعان. ەكىنشى ءۇي ءىشىنارا قيراعان.
كۋاگەرلەر تەلەارناعا جارىلىستان كەيىن ادامداردىڭ جان-جاققا قاشا باستاعانىن ايتتى. ءورتتىڭ سەبەبى انىقتالىپ جاتىر، ساراپتاما تاعايىندالدى. جۇمىس توبى كەلتىرىلگەن شىعىننىڭ مولشەرىن ەسەپتەپ جاتىر.