اباي وبلىسىنىڭ مامانداندىرىلعان اۋدانارالىق سوتىندا جاسوسپىرىمگە قاتىستى ۇكىم شىقتى. ول ۇلتارالىق ارازدىقتى قوزدىردى دەپ ايىپتالعان.
بۇل تۋرالى Infohub.kz اقپارات اگەنتتىگى حابارلايدى.
وقيعانىڭ ءمان-جايى
ءىس ماتەريالدارىنا سايكەس، 2025 جىلدىڭ اقپان ايىندا ءجاسوسپىرىم ب.، ءوزىن سكينحەدتەردىڭ ءناسىلشىل قوزعالىسىنىڭ ءىزباسارىمىن دەپ ساناي وتىرىپ، Telegram مەسسەندجەرىندە «Skinheads industries-Semey» اتتى چات اشقان.
«توپتىڭ ادمينيستراتورى بولعان ول، ادامداردى ۇلتىنا قاراي قورلايتىن، اسىرەسە ءۇندىستاننان كەلگەن ستۋدەنتتەر مەن ولاردىڭ مادەنيەتىنە قاتىستى پىكىرلەر ايتىلعان ماتىندىك جانە دىبىستىق حابارلامالار جاريالاعان»، - دەلىنگەن حابارلامادا.
بۇعان قوسا، ءجاسوسپىرىم چات قاتىسۋشىلارىن ءوز كوزقاراستارىن قولداۋعا جانە سەمەي اۋماعىندا ەكسترەميستىك يدەيالاردى تاراتۋ ءۇشىن باسقالاردى، سونىڭ ىشىندە كامەلەتكە تولماعانداردى تارتۋعا شاقىرعان.
سوت شەشىمى
پروكۋرور جاسوسپىرىمگە 1 جىل 4 اي باس بوستاندىعىن شەكتەۋدى سۇراعان. ءجاسوسپىرىم كىناسىن تولىق مويىنداپ، وكىنگەن.
«سوتتا جاۋاپكەرشىلىكتى جەڭىلدەتەتىن ءمان-جايلار – كامەلەتكە تولماعان جاسى مەن كىناسىن مويىنداۋى، سونداي-اق ب.-نىڭ بۇرىن قىلمىستىق جاۋاپكەرشىلىككە تارتىلماعانى ەسكەرىلدى. كامەلەتكە تولماعاندار ءۇشىن جازانىڭ نەعۇرلىم جەڭىل شەكتەرىن كوزدەيتىن قىلمىستىق كودەكستىڭ 55-بابى، 2-تارماعىنىڭ 2-تارماعى تالاپتارىن ەسكەرە وتىرىپ، سوت ب.-عا 1 جىل 4 اي مەرزىمگە باس بوستاندىعىن شەكتەۋ تۇرىندەگى جازا تاعايىندادى»، - دەلىنگەن سوت حابارلاماسىندا.
سوت قىلمىستىق كودەكستىڭ 81-بابىنىڭ تالاپتارىن ەسكەردى، وعان سايكەس باس بوستاندىعىن شەكتەۋ كامەلەتكە تولماعاندارعا 2 جىلعا دەيىنگى مەرزىمگە تاعايىندالادى.
ۇكىم زاڭدى كۇشىنە ەندى.
سوت سونداي-اق، ەكسترەميستىك يدەيالاردى تاراتۋ، ادامداردى ۇلتىنا قاراي قورلاۋ جانە ارانداتۋعا شاقىرۋ قىلمىستىق جاۋاپتىلىققا جاتاتىنىن، ونىڭ ىشىندە ينتەرنەتتە جاسالعان جاعدايلاردا دا ەكەنىن ەسكە سالدى.