سەمەيدە ەر ادام ايەلىن ءولتىردى دەگەن ايىپپەن سوتقا تارتىلادى. قايتىس بولعان ايەلدىڭ تۋىستارىنىڭ ايتۋىنشا، ونى بەيسبول بيتاسىمەن شامامەن 28 رەت ۇرعان، دەپ حابارلايدى infohub.kz NUR.KZ-گە سىلتەمە جاساپ.
Telegram-ارناسى «كريمينالنىي كازاحستان» حابارلاعانداي، قايتىس بولعان ايەلدىڭ تۋىستارىنىڭ سوزىنە سۇيەنسەك، ءساۋىر ايىندا 52 جاستاعى ايەل كۇيەۋىنە اجىراسقىسى كەلەتىنىن ايتقان. بىرنەشە كۇننەن كەيىن ەر ادام ونىڭ زاتتارى مەن قۇجاتتارىن، سونداي-اق ورتاق بالالارىنىڭ قۇجاتتارىن ورتەپ جىبەرگەن. «كەيىن ول ايەلىن تورۋىلداپ، ونى بەيسبول بيتاسىمەن شامامەن 28 رەت ۇرعان. العان جاراقاتتارىنان ايەل كوز جۇمدى. قايتىس بولعان ايەلدىڭ تۋىستارى ەر ادامنىڭ كوپ جىلدار بويى ىشىمدىككە سالىنعانىن، ايەلىن ۇرىپ-سوققانىن جانە ول كەتۋگە شەشىم قابىلداعاننان كەيىن ونى قۋدالاعانىن ايتادى»، — دەلىنگەن جازبادا.
Telegram-ارناسىنىڭ مالىمەتىنشە، وقيعادان كەيىن كۇدىكتى جاسىرىنعان، الايدا كوپ ۇزاماي ۇستالىپ، قاماۋعا الىنعان. ءىس «ءولتىرۋ» بابى بويىنشا تەرگەلگەن.
اباي وبلىسى پوليسيا دەپارتامەنتىنىڭ تۇسىندىرۋىنشە، قىلمىستىق ءىس سوتقا جىبەرىلگەندىكتەن، سوت شەشىمى شىققانعا دەيىن پوليسيا دەپارتامەنتى ءىستىڭ ءمان-جايىنا تۇسىنىكتەمە بەرۋگە جانە دالەلدەمەلەرگە باعا بەرۋگە قۇقىلى ەمەس.