سەمەيدە 6 جاسار بالانىڭ تەنتەكتىگىنەن كولىك ورتەندى. پوليسيا قىزمەتكەرلەرى وقيعانىڭ ءمان-جايىن انىقتادى، ەندى بالانىڭ اتا-اناسى كولىك يەسىنە شىعىندى وتەۋى كەرەك، دەپ حابارلايدى infohub.kz سايتى.
وقيعا 15 شىلدەدە 352ء-شى كۆارتالداعى تۇرعىن ءۇيدىڭ اۋلاسىندا بولدى. ءورت تۋرالى حابار توتەنشە قىزمەتكە ساعات 18:05-تە ءتۇستى. توتەنشە جاعدايلار دەپارتامەنتىنىڭ كەلگەن قىزمەتكەرلەرى ءورتتى دەرەۋ ءسوندىردى.
تەكسەرۋ بارىسىندا پوليسيا قىزمەتكەرلەرى بەينەباقىلاۋ كامەرالارىنىڭ جازبالارىن زەردەلەدى. ءورت شىعۋدان ءسال بۇرىن كولىك جانىندا ءۇش كامەلەتكە تولماعان بالا بولعانى انىقتالدى. الدىن الا مالىمەتتەر بويىنشا، ءبىر بالا سىرىڭكەمەن كولىك ماڭىنداعى قۇرعاق وسىمدىكتەردى ورتەگەن. ءورت تاراي باستاعاندا بالالار قورقىپ، قاشىپ كەتكەن.
بۇل ءمان-جايلار كامەلەتكە تولماعانداردىڭ زاڭدى وكىلدەرىن سۇراۋ كەزىندە راستالدى. ۆەدومستۆودا اتاپ وتكەندەي، 6 جاسار بالانىڭ اتا-اناسى كولىك يەسىنە كەلتىرىلگەن زالالدى وتەۋگە ءتيىس.