قازاقستان رەسپۋبليكاسى ەكولوگيا مينيسترلىگىنىڭ حابارلاۋىنشا، «سەمەي ورمانى» رەزەرۆاتىنداعى اشىق جالىن تولىعىمەن ءسوندىرىلدى، ءبىراق قۇتقارۋشىلار ءالى دە شوقتارمەن كۇرەسۋدە. بۇل تۋرالى infohub.kz سايتى حابارلايدى.
08:00-دەگى جاعداي بويىنشا ءورتتى سوندىرۋگە 769 ادام، 191 بىرلىك جەرۇستى تەحنيكاسى جانە 8 تىكۇشاق جۇمىلدىرىلدى. ءورت تاۋلىك بويى سوندىرىلۋدە.
ەكولوگيا جانە تابيعي رەسۋرستار ءمينيسترى ەرلان نىسانبايەۆ پەن اباي وبلىسىنىڭ اكىمى بەرىك ءۋالي ءورت اۋماعىن جەكە ۇشىپ شولدى.
«تۇنگى ۋاقىتتا ءورتتى ءسوندىرۋ بويىنشا بۇكىل پەريمەتر بويىنشا جۇمىستار جۇرگىزىلدى، كۇزەتۋ جانە ءورتتىڭ ودان ءارى تارالۋىن بولدىرماۋ ءۇشىن شەتتەرىن سۋلاۋ ىسكە اسىرىلدى. كۇن جارىق بولعاننان كەيىن ءورت وشاعىنا قولجەتپەيتىن ۋچاسكەلەردى ءسوندىرۋ ءۇشىن جاياۋ دەسانت دەرەۋ جىبەرىلدى»، — دەپ اتاپ ءوتتى ۆەدومستۆودا.
ەكولوگيا مينيسترلىگى قازىرگى ۋاقىتتا اشىق جالىن بايقالمايتىنىن قوستى. جەكەلەگەن شوق وشاقتارىن جويۋ بويىنشا جۇمىستار جۇرگىزىلۋدە. «سونىمەن قاتار، ىشكى ءورت وشاقتارىنا سۋ توگەتىن اۆياسيانى كەڭىنەن قولدانۋ ۇيىمداستىرىلدى»، — دەپ ناقتىلادى مينيسترلىكتە. ءورت ءسوندىرۋ باستالعاننان بەرى اۆياسيا 243 رەت سۋ توگىپ، ءورت وشاعىنا 546 توننا سۋ جەتكىزىلدى.
ەسكە سالا كەتەيىك، 16 شىلدەدە اباي وبلىسىنىڭ بورودۋليحا اۋدانىندا توتەنشە قىزمەتتەردى جۇمىلدىرۋ جاريالاندى. مەملەكەتتىك ورمان تابيعي رەزەرۆاتى «سەمەي ورمانى» فيليالىنىڭ اۋماعىندا ورمان ءماسسيۆىنىڭ ءىرى تۇتانۋى بولدى. بۇل وڭىردەگى ورمان ورتتەرىنىڭ جوعارى ءقاۋپىن ەسكەرە وتىرىپ، سوندىرۋگە ءىرى كۇشتەر جۇمىلدىرىلدى. كەيىن پرەمەر-مينيستر ولجاس بەكتەنوۆتىڭ تاپسىرماسى بويىنشا اباي وبلىسىنا تجم باسشىسى شىڭعىس ارينوۆ جانە ەكولوگيا جانە تابيعي رەسۋرستار ءمينيسترى ەرلان نىسانبايەۆ باردى. تاۋلىك ىشىندە قازاقستاننىڭ مەملەكەتتىك ورمان قورى اۋماعىندا 10 ورمان ءورتى تىركەلدى.