«سەمەي ورمانى» مەملەكەتتىك ورمان تابيعي رەزەرۆاتىنداعى ورمان ءورتىن ءسوندىرۋ جۇمىستارى تاۋلىك بويى جالعاسۋدا. ءورت سوندىرۋشىلەر اشىق جالىندى جويۋعا قول جەتكىزدى، دەپ حابارلايدى infohub.kz سايتى.
ەكولوگيا مينيسترلىگىنىڭ مالىمەتىنشە، 17 شىلدە ساعات 7:00-دەگى جاعداي بويىنشا ءورتتى سوندىرۋگە 769 ادام، 191 بىرلىك جەرۇستى تەحنيكاسى جانە 8 تىكۇشاق جۇمىلدىرىلدى.
«بارلىق تارتىلعان قىزمەتتەردىڭ ۇيلەسىمدى جانە جەدەل ارەكەتتەرىنىڭ ارقاسىندا اشىق جالىن ءسوندىرىلدى، قازىرگى ۋاقىتتا جەكەلەگەن تۇتانۋ وشاقتارىن جويۋ جۇمىستارى جۇرگىزىلۋدە. ءتۇن بويى جەكە قۇرام ءورتتى وقشاۋلاۋ جۇمىستارىن جالعاستىردى»، — دەدى مينيسترلىكتە.
ءورت ءسوندىرۋ باستالعالى بەرى اۆياسيا 219 رەت سۋ توگىپ، ءورت وشاعىنا 474 توننا سۋ جەتكىزىلدى.
قازىرگى تاڭدا ورمان ءورتىن وقشاۋلاۋ جانە تولىق جويۋ جۇمىستارى جالعاسۋدا. ەكولوگيا مينيسترلىگىنىڭ مالىمەتىنشە، جاعداي تۇراقتى باقىلاۋدا.
بۇعان دەيىن اباي وبلىسىنداعى رەزەرۆات اۋماعىندا ورمان ءورتى بولعانى حابارلانعان بولاتىن. ونى سوندىرۋگە جەرۇستى تەحنيكاسى مەن اۆياسيا جۇمىلدىرىلدى. ءورت سالدارىنان «DosbolLike» لاگەرىنەن 190 بالا جانە 20 قىزمەتكەر ەۆاكۋاسيالاندى. پرەمەر-مينيستر ولجاس بەكتەنوۆ وقيعا ورنىنا مينيسترلەردى شۇعىل جىبەردى. الدىڭعى كۇنى ەكولوگيا مينيسترلىگى مەن تجم ءورتتىڭ اۋەدەن تۇسىرىلگەن فوتو جانە بەينەجازبالارىن كورسەتكەن ەدى.