16 شىلدەدە اباي وبلىسىنىڭ بورودۋليحا اۋدانىندا ءىرى ورمان ءورتى شىقتى. ونىڭ سالدارىنان جازعى لاگەردەن 190 بالا ەۆاكۋاسيالاندى. ءورتتى ءسوندىرۋدى ءورت ءقاۋىپىنىڭ توتەنشە كلاسى مەن قاتتى ىستىق قيىنداتىپ وتىر، دەپ حابارلايدى Orda.kz ءتىلشىسى.
ءورت ورنىنا مەملەكەتتىك ورمان قورعاۋ قىزمەتى مەن تجد قىزمەتكەرلەرى جىبەرىلدى. سونداي-اق، Bambi Bucket سۋ توگەتىن قۇرىلعىسىمەن جابدىقتالعان AS350 تىكۇشاعى جانە اۆياسيالىق ءورت ءسوندىرۋ قىزمەتىنىڭ ءتورت دەسانتنيك اتتاندى. كاتون-قاراعاي اۋىلىنان «قازاۆياورمانقورعاۋ» رمك-نىڭ مي-8 تىكۇشاعى ۇشىپ كەلدى. «ورمان ءورتى «سەمەي ورمانى» مەملەكەتتىك ورمان تابيعي رەزەرۆاتىنىڭ بورودۋليحا فيليالىنىڭ كامىشەن ورمانشىلىعىنىڭ 57 كۆارتالىندا تىركەلدى»، — دەپ حابارلادى قازاقستان ەكولوگيا جانە تابيعي رەسۋرستار مينيسترلىگى.
جەدەل اقپارات بويىنشا، ءورت سوندىرۋگە 101 پوليسيا قىزمەتكەرى، 25 قىزمەتتىك كولىك، ونىڭ ىشىندە ءتورت اۆتوبۋس جانە ەكى كاماز جۇمىلدىرىلدى. تىكۇشاقتار سۋ توگەتىن قۇرىلعىلار ارقىلى 24 رەت سۋ شاشتى. ءورت ورنىنا قوسىمشا كۇش پەن تەحنيكا جىبەرىلۋدە.
اباي وبلىسى تجد ءباسپاسوز قىزمەتى كامىشەن ورمانشىلىعى اۋماعىندا ورنالاسقان Dos Bol Like جازعى لاگەرىنەن 190 بالانىڭ ەۆاكۋاسيالانعانىن راستادى. ەكى بالانى اتا-اناسى الىپ كەتتى، ال 188 بالا بورودۋليحا اۋىلىنا ەۆاكۋاسيالاندى.
ەسكە سالا كەتەيىك، 2023 جىلى جازدا وسى رەزەرۆات اۋماعىندا قازاقستان تاريحىنداعى ەڭ ءىرى ورمان ءورتى بولىپ، 15 ادام قازا تاپتى. بۇعان دەيىن ستەپنوگورسك ماڭىندا نايزاعاي سوعۋىنان ەگىستىكتەردىڭ ۇزاق ۋاقىت جانعانى حابارلانعان ەدى.
ماتەريال Orda.kz سايتىنىڭ مالىمەتى بويىنشا دايىندالدى.