16 شىلدەدەن بەرى اباي وبلىسىندا ورشىگەن ءىرى ورمان ءورتىن وقشاۋلاۋعا قول جەتكىزىلدى. بۇل تۋرالى تجم رەسمي مالىمدەمە جاسادى، دەپ حابارلايدى infohub.kz سايتى.
«اباي وبلىسىنداعى «سەمەي ورمانى» مەملەكەتتىك ورمان تابيعي رەزەرۆاتى بورودۋليحا فيليالىنىڭ كامىشەنكا ورمانشىلىعى اۋماعىنداعى ءورت وقشاۋلاندى»، — دەلىنگەن تجم حابارلاماسىندا.
ورتپەن كۇرەسۋگە 623 ادام، 169 بىرلىك جەرۇستى تەحنيكاسى جانە جەتى تىكۇشاق جۇمىلدىرىلدى. ءورت سوندىرۋشىلەردىڭ جۇمىسىن شىلدەنىڭ اپتاپ ىستىعى، ءورت ءقاۋىپىنىڭ جوعارى دەڭگەيى جانە قول جەتپەيتىن جەرلەر قيىنداتتى. پرەمەر-مينيستردىڭ تاپسىرماسى بويىنشا وقيعا ورنىنا قازاقستان تجم باسشىسى شىڭعىس ءارىنوۆ جانە ەكولوگيا جانە تابيعي رەسۋرستار ءمينيسترى ەرلان نىسانبايەۆ كەلدى.
بۇعان دەيىن رەزەرۆاتتا اشىق جانۋ تولىعىمەن جويىلعانى حابارلانعان ەدى، الايدا قۇتقارۋشىلار شوقتالعان وشاقتارمەن كۇرەسۋدى جالعاستىرۋدا. ورمان ءورتىنىڭ جالپى اۋدانى 370 گەكتارعا جەتتى. ءورتتىڭ رەسمي سەبەبى ءالى انىقتالعان جوق، الايدا الدىن الا نۇسقا رەتىندە ەكولوگيا ءمينيسترى نايزاعايدى اتادى.
«سەمەي ورمانى» قازاقستان تاريحىنداعى ەڭ قورقىنىشتى ورمان تراگەديالارىنىڭ ءبىرىنىڭ ورنىنا اينالعان بولاتىن. 2023 جىلعى ماۋسىمدا مۇندا اۋقىمدى ءورت بولىپ، سالدارىنان ورمان شارۋاشىلىعىنىڭ 15 قىزمەتكەرى قازا تاپتى. 2026 جىلعى ماۋسىمنىڭ باسىندا ۇكىمەتتەگى بريفينگتە جۋرناليستەر ەكولوگيا جانە تابيعي رەسۋرستار ۆيسە-مينيسترى نۇركەن شاربيەۆتەن تراگەديادان كەيىن وسىنداي ورتتەردىڭ الدىن الۋ، ورتكە قارسى تەحنيكانى جاڭارتۋ جانە ورمان شارۋاشىلىعى قىزمەتكەرلەرىنىڭ جالاقىسىن كوتەرۋ بويىنشا قانداي شارالار قابىلدانعانىن سۇرادى.