بۇرىنعى سەمەي سىناق پوليگونىنىڭ اۋماعىندا مەملەكەتتىك قورداعى پايدالى قازبالاردىڭ بەس كەن ورنى انىقتالدى، دەپ حابارلايدى infohub.kz.
ونەركاسىپ جانە قۇرىلىس مينيسترلىگىنىڭ «كۋرسيۆكە» بەرگەن جاۋابىندا ايتىلعانداي، ولاردىڭ قاتارىندا ەسىمجال رەزەرۆتىك مارگانەس كەن ورنى بار، ونىڭ قۇرامىنا ەسىمجال، داۋلەتپاي جانە وڭتۇستىك قوستاراق ۋچاسكەلەرى كىرەدى. ونىڭ جالپى بالانستىق قورى 999 مىڭ توننا مارگانەس رۋداسىن قۇرايدى.
سونىمەن قاتار، پوليگون اۋماعىندا بالانستان تىس قورى 4 357 توننا بولاتىن قاراجال رەزەرۆتىك بەريللي كەن ورنى ورنالاسقان.
سونداي-اق، مۇندا شورسكوە مىس-موليبدەن كەن ورنى (شىعىس ۋچاسكەسى) بار، ول قاتتى پايدالى قازبالاردى ءوندىرۋ ءۇشىن باسىمدىق تارتىپپەن «شىعىس موليبدەن» جشس-نە (يەسى – ماحمۇد قاسىمبەكوۆ، تۇڭعىش پرەزيدەنت نۇرسۇلتان نازاربايەۆ كەڭسەسىنىڭ بۇرىنعى باسشىسى) بەرىلگەن.
بۇدان باسقا، بۇرىنعى پوليگون اۋماعىندا بولدىكول جانە بايبولات التىن كەن ورىندارى ورنالاسقان. بولدىكول كەن ورنىنا جەر قويناۋىن پايدالانۋ قۇقىعىن اۋكسيون جەڭىمپازى «BKO SMART» ج ش س (يەسى – باقىتبەك نابييەۆ)، ال بايبولات كەن ورنىنا «ZHAMBAS-PV» ج ش س (يەلەرى – ايبەك پەن قۋات ورازيماندار، ورازيمان وتباسىنا بريتاندىق Caspian Sunrise مۇناي ءوندىرۋ جانە بارلاۋ كومپانياسىنىڭ ۇلەسى تيەسىلى. ونىڭ نەگىزگى قىزىعۋشىلىعى كاسپي ماڭى باسسەينىندەگى BNG كەلىسىمشارتتىق ۋچاسكەسىنە بايلانىستى) يە بولدى.
سونىمەن قاتار، مينيسترلىك قازىرگى ۋاقىتتا بۇرىنعى پوليگون اۋماعىندا تاۋ-كەن بايىتۋ كومبيناتتارىن، وڭدەۋ كاسىپورىندارىن نەمەسە وزگە دە ونەركاسىپتىك ينفراقۇرىلىمدى سالۋ جوبالارىنىڭ ىسكە اسىرىلۋى تۋرالى اقپاراتقا يە ەمەس ەكەنىن حابارلادى. سونداي-اق، ۆەدومستۆودا وسى كەن ورىندارىن يگەرۋدەن تۇسەتىن ينۆەستيسيالاردىڭ الدىن الا كولەمى مەن كۇتىلەتىن ەكونوميكالىق تيىمدىلىك تۋرالى دەرەكتەر جوق.
ەسكە سالايىق، سەمەي يادرولىق قاۋىپسىزدىك ايماعى – بۇرىنعى سەمەي سىناق يادرولىق پوليگونىندا يادرولىق قارۋ سىناقتارى سالدارىنان نورماتيۆتەن تىس راديواكتيۆتى لاستانۋعا ۇشىراعان قازاقستان اۋماعىنىڭ شەكتەۋلى بولىگى، وندا زاڭنامادا كوزدەلگەن ارنايى قۇقىقتىق رەجيم قولدانىلادى.
بۇعان دەيىن «كۋرسيۆ» Altyn Group Qazaqstan كومپانياسى بۇرىنعى سەمەي سىناق پوليگونىنىڭ اۋماعىندا التىن ءوندىرۋدى جوسپارلاپ وتىرعانىن جازعان بولاتىن. كومپانيانىڭ تاپسىرىسى بويىنشا جۇرگىزىلگەن زەرتتەۋ 73 توننادان استام التىن قورى بار ۇلكەن قاراشوقى كەن ورنى ادامدارعا رادياسيالىق ءقاۋىپ توندىرمەيتىنىن كورسەتتى.