الەۋمەتتىك جەلىلەردە سەمەيدەگى مەيرامحانالاردىڭ ءبىرىنىڭ قىزمەتكەرلەرى مەكەمە جۇمىسىنىڭ توقتاتىلعانى تۋرالى حابارلاما جاريالادى. اباي وبلىسى پوليسيا دەپارتامەنتى جاعدايدى ءتۇسىندىردى، دەپ حابارلايدى infohub.kz.
قىزمەتكەرلەردىڭ ايتۋىنشا، 28 تامىزدا ولاردىڭ مەيرامحاناسىنىڭ قىزمەتى توقتاتىلعان. ولار بۇعان جەتكىلىكتى زاڭدى نەگىز بولماعانىن ايتادى. مەكەمە اكىمشىلىگى لاۋازىمدى تۇلعالاردىڭ ارەكەتىن تەكسەرۋدى سۇراعان.
اباي وبلىسى پوليسيا دەپارتامەنتى Instagram-پاراقشاسىندا جاعدايعا تۇسىنىكتەمە بەردى. ۆەدومستۆو مەيرامحانا قىزمەتىنىڭ توقتاتىلماعانىن مالىمدەدى. «سەمەي پروكۋراتۋراسىنىڭ ۇيلەستىرۋىمەن سوتقا دەيىنگى تەرگەۋ ورگانى بۇزاقىلىق فاكتىسى بويىنشا تەرگەۋ ارەكەتتەرىن جۇرگىزۋ جانە جاعدايدى ساقتاۋ ءۇشىن تەك وقيعا ورنىنا ۋاقىتشا كىرۋدى شەكتەدى»، — دەپ حابارلادى اباي وبلىسى پد.
ۆەدومستۆونىڭ دەرەگىنشە، 22 تامىزدا تاڭعى ساعات 04:00 شاماسىندا بي الاڭىندا بەلگىسىز ەر ادام ەشقانداي سەبەپسىز استانانىڭ 37 جاستاعى تۇرعىنىنىڭ بەتىنە سوققى جاساعان. «سوققىدان ەر ادام قۇلاپ، ۇزاق ۋاقىت ەس-تۇسسىز جاتقان. وعان جانىنداعى كەلۋشىلەر كومەك كورسەتكەن. ال مەكەمە اكىمشىلىگى پوليسيا مەن جەدەل جاردەمدى ۋاقىتىندا شاقىرماعان»، — دەپ اتاپ ءوتتى اباي وبلىسى پد.
مۇندا ۆەدومستۆو بۇل مەكەمە سوڭعى كەلۋشىگە دەيىن جۇمىس ىستەيتىنىن، الايدا ىشىندە تۇراقتى ليسەنزيالانعان كۇزەت جوق ەكەنىن قوستى. «قالىپتاسقان جەدەل جاعدايدى ەسكەرە وتىرىپ، اكىمشىلىك قابىلداپ جاتقان شارالار قاۋىپسىزدىك پەن ءتارتىپتىڭ ءتيىستى دەڭگەيىن قامتاماسىز ەتپەيدى، سوندىقتان پوليسيا كلۋب ماڭىنا قوسىمشا نارياد قويادى. بيىلعى جىلدىڭ باسىنان بەرى مەكەمە ىشىندە قۇقىق بۇزۋشىلىق تۋرالى 15 حابارلاما تىركەلگەن. ەكى توپتىق توبەلەس فاكتىسى بويىنشا سوتقا دەيىنگى تەرگەۋ جۇرگىزىلۋدە»، — دەپ ءتۇسىندىردى ۆەدومستۆودا.
پوليسيا «تۇتىنۋشىلاردىڭ قۇقىقتارىن قورعاۋ تۋرالى» ق ر زاڭىنىڭ 11 جانە 24-باپتارىنا سايكەس ويىن-ساۋىق مەكەمەلەرىنىڭ يەلەرى مەن باسشىلارى كەلۋشىلەرگە ءقاۋىپسىز جاعداي جاساۋعا مىندەتتى ەكەنىن ەسكە سالدى. مەكەمەدە جانجالدار مەن باسقا دا قۇقىق بۇزۋشىلىقتاردىڭ الدىن الاتىن جانە جولىن كەسەتىن ءتيىستى كۇزەت ۇيىمداستىرىلۋى ءتيىس. كەز كەلگەن وقيعا تۋرالى اكىمشىلىك دەرەۋ پوليسياعا حابارلاۋعا، ال زارداپ شەككەندەر بولسا، جەدەل جاردەم شاقىرۋعا مىندەتتى.
«ءاربىر كەلۋشى ءقاۋىپسىز دەمالىسقا قۇقىلى. كورسەتىلەتىن قىزمەتتەردىڭ قاۋىپسىزدىگىن قامتاماسىز ەتۋ مەكەمە اكىمشىلىگىنىڭ مىندەتى»، — دەدى قۇقىق قورعاۋ ورگاندارىنىڭ وكىلدەرى.