سەمەيدە باستاۋىش سىنىپ ءمۇعالىمىنىڭ ابىرويى مەن ىسكەرلىك بەدەلىنە نۇقسان كەلتىرگەن اقپاراتتىڭ شىندىققا جاناسپايتىنى سوتتا انىقتالدى، دەپ حابارلايدى infohub.kz.
اباي وبلىسى سوتتارىنىڭ رەسمي Telegram-ارناسىندا حابارلانعانداي، سەمەي قالاسىنىڭ اۋدانارالىق ازاماتتىق ىستەر جونىندەگى سوتى باستاۋىش سىنىپ ءمۇعالىمىنىڭ ابىرويى، قادىر-قاسيەتى جانە ىسكەرلىك بەدەلىن قورعاۋ، سونداي-اق مورالدىق زياندى وتەۋ تۋرالى تالاپ ارىزىن قارادى.
سوتقا جۇگىنۋگە مەكتەپ ديرەكتورىنا داۋىستىق حابارلاما جىبەرۋ، سودان كەيىن ۇجىم قاتىسۋىمەن وتكەن كەزدەسۋدە تاراتىلعان مالىمەتتەر سەبەپ بولدى. جاۋاپكەر ءمۇعالىمنىڭ ۇنەمى ىشىمدىك ىشەتىنىن، جۇمىسقا اراق يىسىمەن كەلەتىنىن جانە «تۇستەن كەيىن ىشىمدىك ىشۋگە كەتەتىنىن» ايتقان.
تالاپكەر تاراتىلعان مالىمەتتەردىڭ جالعان ەكەنىن مويىنداتۋدى، جاۋاپكەردى ولاردى جوققا شىعارۋعا، كەشىرىم سۇراۋعا جانە مورالدىق زياندى وتەۋگە مىندەتتەۋدى سۇرادى.
ءىس ماتەريالدارىن زەردەلەگەن سوت جاۋاپكەردىڭ تاراتقان مالىمەتتەرىنىڭ شىندىققا جاناساتىنىن دالەلدەيتىن ەشقانداي دالەل كەلتىرمەگەنىن انىقتادى. سوت-پسيحولوگيالىق-فيلولوگيالىق ساراپتاما قورىتىندىسىن ەسكەرە وتىرىپ، سوت ابىرويدى، قادىر-قاسيەتتى جانە ىسكەرلىك بەدەلدى قورعاۋ شارتتارىنىڭ بار ەكەنىن انىقتادى: مالىمەتتەر ءۇشىنشى تۇلعالارعا تاراتىلعان، جالا جابۋ سيپاتىندا بولعان جانە شىندىققا سايكەس كەلمەگەن.
سوت جاۋاپكەردى مەكتەپ ديرەكتورى مەن وقۋ-تاربيە ءىسى جونىندەگى ورىنباسارىنىڭ قاتىسۋىمەن كەشىرىم سۇراۋ ارقىلى تاراتىلعان مالىمەتتەردى جوققا شىعارۋعا مىندەتتەدى. جاۋاپكەردىڭ ارەكەتىنىڭ سيپاتىن، تاراپتار اراسىنداعى جانجالدىڭ ۇزاقتىعىن، پاراساتتىلىق پەن ادىلدىك تالاپتارىن ەسكەرە وتىرىپ، سوت مورالدىق زياننىڭ وتەماقىسىن ءىشىنارا قاناعاتتاندىردى، سونداي-اق سوت شىعىندارىن ءوندىردى.
سوت شەشىمى زاڭدى كۇشىنە ەنگەن جوق.