وڭتۇستىك كورەيا استاناسىنداعى قۇرىلىس الاڭىندا قايعىلى وقيعا بولدى: بەتون توبەنىڭ ءبىر بولىگى قۇلاپ، قازاقستان ازاماتى قازا تاپتى. ازاماتتىڭ قازا تاپقانىن قازاقستان سىرتقى ىستەر مينيسترلىگى راستادى، دەپ حابارلايدى infohub.kz سايتى.
Yonhap اگەنتتىگىنىڭ مالىمەتىنشە، سەيسەنبى كۇنى سەۋلدىڭ وڭتۇستىك بولىگىندەگى كوپپاتەرلى تۇرعىن ءۇي قۇرىلىسىندا بەتون توبەنىڭ ءبىر بولىگى قۇلاپ، قازاقستاندىق جۇمىسشى قازا تاپقان.
وڭتۇستىك كورەيا ەڭبەك مينيسترلىگىنىڭ دەرەگىنشە، 30 شاماسىنداعى ەر ادام عيماراتتىڭ 23-قاباتىنداعى پاتەرلەردىڭ بىرىندە تازالاۋ جۇمىسىنىڭ باستالۋىن كۇتىپ تۇرعان. تاڭعى 9:45 شاماسىندا بەتون توبەنىڭ ءبىر بولىگى قۇلاپ، ونى سوققان.
ۆەدومستۆونىڭ حابارلاۋىنشا، ەلدىڭ ەڭبەك مينيسترلىگى نىسانداعى جۇمىستى دەرەۋ توقتاتىپ، پوليسيامەن جانە قۇرىلىس قاۋىپسىزدىگىن قامتاماسىز ەتەتىن ورگاندارمەن بىرلەسىپ وقيعانى تەرگەۋدى باستادى.
پوليسيا مەن ەڭبەك مينيسترلىگى اپاتتىڭ سەبەپتەرىن انىقتاپ، وعان قاتىسقان كومپانيالاردىڭ ەڭبەك قاۋىپسىزدىگى تۋرالى زاڭداردى بۇزعانىن نە بۇزباعانىن انىقتاۋدى كوزدەپ وتىر.
قازاقستان سىرتقى ىستەر مينيسترلىگى NUR.KZ تىلشىسىنە ەلىمىزدىڭ ازاماتىنىڭ قازا تاپقانىن راستادى. «سىرتقى ىستەر مينيسترلىگى سەۋلدە قۇرىلىستا بولعان جازاتايىم وقيعا سالدارىنان قازاقستان رەسپۋبليكاسى ازاماتىنىڭ قازا تاپقانىن راستايدى. كورەيا رەسپۋبليكاسىنىڭ قۇزىرەتتى ورگاندارى وقيعانى تەرگەۋدى باستادى. قازاقستاندىق ديپلوماتتار قازا تاپقان ازاماتتىڭ تۋىستارىمەن بايلانىس ورناتىپ، ولارعا كونسۋلدىق-قۇقىقتىق كومەك كورسەتۋدە»، — دەلىنگەن حابارلامادا.