يسپانيانىڭ سولتۇستىك افريكاداعى سەۋتا انكلاۆىندا جاپپاي ءوتۋ كەزىندە قالعان 1000-عا جۋىق كامەلەتكە تولماعان ميگرانت ءالى دە وتباسىسىز، بوتەن ەلدە قالىپ وتىر. بۇل تۋرالى infohub.kz سايتى حابارلايدى.
وتكەن اپتاداعى جاپپاي شەكارا بۇزۋ وقيعاسىنان كەيىن سەۋتادا ازىق-ت ۇلىك دۇكەندەرى قايتا اشىلدى، ءبىراق ەڭ وسال توپ — كامەلەتكە تولماعاندار — ءالى دە كومەكسىز قاڭعىرىپ ءجۇر. 17 جاستاعى قىز Associated Press اگەنتتىگىنە ءوزىنىڭ 8 جاسار ءىنىسىنىڭ تولقىندا باتىپ كەتكەنىن، اناسىنان ءبولىنىپ، ءقازىر سەۋتا كوشەلەرىندە قايىر سۇراپ جۇرگەنىن ايتتى. ونىڭ سوزىنشە، ول ادامداردىڭ ولىكتەردى تاپتاپ وتكەنىن كورگەن.
يسپانيانىڭ ىشكى ىستەر ءمينيسترى فەرناندو گراندە-مارلاسكانىڭ ايتۋىنشا، وتكەن اپتادا سەۋتاعا شامامەن 72 000 ميگرانت كىرگەن، ونىڭ 70 000-ى قايتارىلعان. الايدا جەرگىلىكتى شەنەۋنىك الەحاندرو راميرەس ناقتى ساندى ايتۋ مۇمكىن ەمەس ەكەنىن، قالادا 3 000-5 000 ادام قالعانىن ايتادى. مينيستر قايتىس بولعاندار سانىن 75-كە جاڭارتتى، بۇعان ماروككو حابارلاعان 11 ءولىم كىرمەيدى.
يسپانيا بيلىگىنىڭ مالىمەتىنشە، كوپتەگەن ميگرانت ەۋروپاعا ءوتۋ مۇمكىندىگىنىڭ ازدىعىن كورىپ، ءوز ەركىمەن قايتقان. باسقالارى شەكاراعا جەتكىزىلىپ، كەرى قايتارىلعان، ءبىراق زاڭ بويىنشا كامەلەتكە تولماعانداردى مۇنداي ارەكەتكە تارتۋعا بولمايدى. تانجەردەن كەلگەن ءجاسوسپىرىم قىز الەۋمەتتىك جەلىدەگى ۇندەۋلەرگە ەرىپ، جاقسى ءومىر ىزدەپ كەلگەنىن، جەرگىلىكتى تۇرعىنداردىڭ ءبىرى وعان تاماق پەن كيىم بەرىپ، ۇيىنە كىرگىزىپ جۋىنۋىنا مۇمكىندىك بەرگەنىن، ءبىراق مەملەكەتتىك جاستار ورتالىعىنىڭ تولى ەكەنىن ايتتى.
ماروككو جاعىنداعى فنيدەك قالاسىندا اتا-انالار بالالارىنىڭ قايتۋىن كۇتىپ، الاڭداۋلى. يبتيسسام شاري ۇلى راياننان حابار كۇتىپ ءجۇر. ول ۇلىنىڭ سەۋتاعا وتكەنىن بىلەدى، ءبىراق سودان بەرى حابار جوق. «كۇن سايىن وسىندا كەلىپ، ەشقانداي جاڭالىق بولماي تۇر. كەيبىر دوستارى قايتىپ كەلدى، بۇل جاقسى جاڭالىق. كوپ ادام قايتىس بولدى دەپ ەستىدىم. قۇداي ساقتاسىن»، — دەيدى ول.
يسپانيا زاڭى بويىنشا ەرەسەك ميگرانتتار باسپانا سۇراي الادى، ءبىراق ماروكالىقتارعا گۋمانيتارلىق قورعاۋ الۋ قيىن. ال اتا-اناسىز كامەلەتكە تولماعاندارعا قورعاۋ مەن قامقورلىق كورسەتىلۋى ءتيىس. AP ءتىلشىسى يسپان ساربازدارىنىڭ جىلاپ، قايتارىلۋىن وتىنگەن ماروكالىق بالانى شەكاراعا الىپ بارعانىن، ءبىراق پولكوۆنيكتىڭ ارالاسۋىمەن بالا يسپانيانىڭ ازاماتتىق گۆاردياسىنا تاپسىرىلعانىن كۋالاندىردى. الايدا باسقا جاسوسپىرىمدەردىڭ شەكاراعا قاراي يتەرىلگەنىن دە كورگەن.
يسپانيا ۇكىمەتى كامەلەتكە تولماعاندارعا كومەككە 25 ميلليون ەۋرو بولەتىنىن جاريالادى. سونداي-اق ازاماتتىق گۆارديا شەكاراداعى كەدەندە حابار-وشارسىز كەتكەندەردى ىزدەۋ بيۋروسىن اشىپ، ەلەكتروندىق پوشتا مەكەنجايىن ۇسىندى. مينيستر گراندە-مارلاسكا: «يسپانيادا كامەلەتكە تولماعانداردىڭ نەگىزگى قۇقىقتارى قۇرمەتتەلەدى»، — دەدى.
سەۋتادا قالعان ەرەسەك ميگرانتتاردىڭ اراسىندا سۋداننان، گازادان، اۋعانستاننان جانە افريكانىڭ بىرنەشە ەلىنەن كەلگەندەر كوپ. ولاردىڭ اراسىندا ازىق-ت ۇلىك تاپشى. بيلىك كەشكە تاماق ۇلەستىرۋىن ۇيىمداستىردى. 25 جاستاعى ماروكالىق احمەد شەناف ەكى كۇن بويى تاماق ىشپەگەنىن، بارلىق دۇكەندەر جابىق بولعانىن ايتتى. «سەۋتاعا كەلۋدى ويلاعاندارعا: سىزدەر ازاپ شەگەسىزدەر. ازىق-ت ۇلىك جوق، ەشكىم بىزگە ەشتەڭە ساتقىسى كەلمەدى»، — دەدى ول. قالاداعى 600 ادامعا ارنالعان ميگرانتتار ورتالىعى تولىپ، كوپشىلىگى جاعاجايدا نەمەسە توبەلەردە ۇيىقتاپ جاتىر. الىستاعى ەۋروپا — ولاردىڭ باستى ماقساتى — تەڭىزدىڭ ارعى جاعىندا.