سامارقاندتا ءوتىپ جاتقان 46-شى دۇنيەجۇزىلىك شاحمات وليمپياداسىنىڭ ونىنشى تۋرىندا قازاقستان ايەلدەر قۇراماسى فرانسيانى 2،5:1،5 ەسەبىمەن جەڭدى. سوڭعى تۋر الدىندا قازاقستاندىق شاحماتشى قىزدار جۇڭگو قۇراماسىنان ءبىر ۇپاي قالىپ، ەكىنشى ورىندا تۇر، دەپ حابارلايدى infohub.kz سايتى.
قاتارىنان ءۇش تەڭ ويىن كوماندامىزدىڭ مەدال ءۇشىن كۇرەسىن قيىنداتقانىمەن، قىزدار تاباندى كۇرەستە فرانسيالىقتاردان باسىم ءتۇستى. شەشۋشى ۇپايدى ءتورتىنشى تاقتادا ەلناز كالياحمەت اكەلدى: قارا تاسپەن ويناعان جاس شاحماتشى 101ء-شى جۇرىستە پاۋلين گيشاردىڭ ساعاتىن توقتاتقىزدى.
كالياحمەتتىڭ جەڭىسى كومانداعا اۋاداي قاجەت ەدى. بيبيسارا اساۋباەۆا ۇتىپ، مەرۋەرت كاماليدەنوۆا جەڭىلىپ، الۋا نۋرمان تەڭ ويناعان سوڭ، كەزەكتى — قاتارىنان ءتورتىنشى — تەڭ ويىننىڭ كولەڭكەسى انىق كورىنگەن. ابىروي بولعاندا، كالياحمەت تەڭ پوزيسيانى بۇزىپ، ويىن سوڭىندا قىڭىر قارسىلاسىن تىزە بۇكتىردى.
كوش باستاپ تۇرعان جۇڭگو وليمپيادادا ەكىنشى ۇپايىن جوعالتتى. العاشقى تەڭ ويىن قازاقستانمەن ماچتا، ەكىنشىسى وتكەن تۋردا ۇندىستانمەن بولدى. ءۇندىستاننىڭ ءسۇرىنۋىنىڭ ارقاسىندا قازاقستان كەستەدە ونىمەن قايتا ورىن اۋىستىردى. سوڭعى تۋر الدىندا قىزدارىمىز — ەكىنشى ورىندا.
دۇنيەجۇزىلىك شاحمات وليمپياداسى-2026
10-شى تۋر. 26 قىركۇيەك. ايەلدەر
قازاقستان – فرانسيا 2،5:1،5
♟️ GM* بيبيسارا اساۋباەۆا (2536) – IM دەيمانتە داۋليتە-كورنەتت (2391) 1:0
♟️ GM ماري سەباگ (2401) – IM الۋا نۋرمان (2455) 0،5:0،5
♟️ IM مەرۋەرت كاماليدەنوۆا (2413) – IM سوفي ميلە (2358) 0:1
♟️ IM پاۋلين گيشار (2344) – WIM ەلناز كالياحمەت (2347) 0:1
* GM – گروسسمەيستەر، IM – حالىقارالىق شەبەر، WIM – ايەلدەر اراسىنداعى حالىقارالىق شەبەر
قازاقستاننىڭ ەرلەر قۇراماسى تۇرىكمەنستاندى 3:1 ەسەبىمەن جەڭىپ، 33ء-شى ورىننان 24ء-شى ورىنعا كوتەرىلدى. ونىڭ ۇستىنە العاشقى وندىقتان قالىسۋى نەبارى ءبىر ۇپاي.
ال كوش باستاپ تۇرعان وزبەكستان-1 قۇراماسى سوڭعى تۋر الدىندا ارمەنيانى 3،5:0،5 ەسەبىمەن جەڭدى.
دۇنيەجۇزىلىك شاحمات وليمپياداسى-2026
10-شى تۋر. 26 قىركۇيەك. ەرلەر
قازاقستان – تۇرىكمەنستان 3:1
♟️ GM* دەنيس ماحنيەۆ (2568) – GM ساپارمۋرات اتابايەۆ (2503) 0،5:0،5
♟️ GM مەيليس اننابەردىيەۆ (2384) – IM ساۋات نۋرگالييەۆ (2493) 0:1
♟️ GM انسات الديار (2495) – FM امانمۋحاممەت حوممادوۆ (2389) 0،5:0،5
♟️ شاحرۋح تۋرايەۆ (2222) – GM جاندوس اگمانوۆ (2490) 0:1
* GM – گروسسمەيستەر، IM – حالىقارالىق شەبەر
سامارقاندتاعى 46-شى دۇنيەجۇزىلىك شاحمات وليمپياداسىنا 398 كوماندا، 1974 شاحماتشى، 240 گروسسمەيستەر قاتىسىپ جاتىر.
تۋرنير شۆەيساريالىق جۇيەمەن 11 تۋردا وتەدى. ءار كوماندانىڭ قۇرامىندا 4 ويىنشى جانە 1 قوسالقى بار. ۋاقىت باقىلاۋى كلاسسيكالىق – العاشقى 40 جۇرىسكە 90 مينۋت، وعان قوسا تاعى 30 مينۋت. ءار جۇرىستەن كەيىن 30 سەكۋند قوسىلادى.
ماچتا جەڭگەن قۇراما ەكى كوماندالىق ۇپاي، تەڭ ويناعاندا ءبىر ۇپاي الادى. ۇپايلار تەڭ بولعان جاعدايدا قوسىمشا كورسەتكىشتەر كۇشىنە ەنەدى.
ەرلەر ءتۋرنيرىنىڭ جەڭىمپازدارىنا لورد فرەدەريك گۋستاۆۋس گاميلتون-راسسەل كۋبوگى، ايەلدەر ءتۋرنيرىنىڭ جەڭىمپازدارىنا ۆەرا مەنچيك كۋبوگى تابىستالادى. ەكى كومانداسىنىڭ ورىندارىنىڭ ەڭ از قوسىندىسى بويىنشا ۇزدىك شىققان فەدەراسيا نونا گاپرينداشۆيلي كۋبوگىمەن ماراپاتتالادى.