سامارقاندتا ءوتىپ جاتقان 46-شى الەمدىك شاحمات وليمپياداسىندا قازاقستاننىڭ ايەلدەر قۇراماسى تۋرنير اياقتالۋعا ەكى تۋر قالعاندا جالپى ەسەپتە ءۇشىنشى ورىندى ساقتاپ تۇر، دەپ حابارلايدى infohub.kz سايتى.
توعىزىنشى تۋردا قازاقستاندىق شاحماتشى قىزدار موڭعوليا قۇراماسىمەن كەزدەستى. تارتىس 2:2 ەسەبىمەن تەڭ اياقتالدى. بيبيسارا اساۋباەۆا مەن الۋا نۇرمان ءوز پارتيالارىندا جەڭىسكە جەتتى، ال مەرۋەرت كاماليدەنوۆا مەن زارينا نۇرعاليەۆا قارسىلاستارىنا جول بەردى.
بۇل تەڭ ناتيجە قازاقستاننىڭ ايەلدەر قۇراماسى ءۇشىن قاتارىنان ءۇشىنشى بولدى. ۇلتتىق كوماندانىڭ ەنشىسىندە ءقازىر 15 ۇپاي بار. ول قوسىمشا كورسەتكىشتەر بويىنشا ءۇندىستاننان قالىپ، ارمەنيانى باسىپ وزعان ءۇشىنشى ورىندا تۇر. تۋرنير كەستەسىندە 17 ۇپاي جيناعان جۇڭگو قۇراماسى كوش باستاپ تۇر.
قازاقستاننىڭ ەرلەر قۇراماسى دا توعىزىنشى تۋردا تەڭ وينادى — پولشا قۇراماسىمەن 2:2. دەنيس ءماحنوۆ پەن ساۋات نۇرعاليەۆتىڭ پارتيالارى تەڭ اياقتالدى، الديار انسات ءوز تاقتاسىندا جەڭىسكە جەتتى، ال دانيال ساپەنوۆ جەڭىلىس تاپتى.
12 ۇپايمەن قازاقستاننىڭ ەرلەر قۇراماسى جالپى ەسەپتە 33ء-شى ورىندا. 16 ۇپايمەن وزبەكستان كومانداسى كوش باستاپ تۇر.
الەمدىك شاحمات وليمپياداسىنىڭ قورىتىندى تۋرلارى 26 جانە 27 قىركۇيەكتە وتەدى.