سوڭعى جاڭارتۋ

(وزگەرتىلگەن ۋاقىتى 5 ساعات بۇرىن)
شال مەن جۇمىسكەر
شال قايتتى مالايىمەن پىشەن شاۋىپ،
بالەنى سەزە مە ادام تۇرعان باعىپ.
ورمانمەن كەشكىتۇرىم كەلە جاتتى،
باراتىن ەلگە تۋرا ءبىر جول تاۋىپ.
تاپ بەردى قارسى الدىنان ايۋ شىعىپ،
بولمادى ايلا ەتەرگە و عىپ، بۇعىپ.
ۇستىنە شالدىڭ ايۋ قونىپ قالدى،
سورلىنى ءا دەگەنشە جەرگە جىعىپ.
جۇمارلاپ، باسىپ-جانشىپ ايۋ شالدى،
جەمەككە ەندى باستاپ ىڭعايلاندى.
«باۋىرىم، پالەنشەجان، ايىرشى-اي»، - دەپ،
مالايعا شال جالىنىپ، قولقا سالدى.
مالايى تەمىر ايىر، بالتانى الىپ،
ايۋدى جىقتى، باسىن، ءىشىن جارىپ.
قان-قان بوپ ءۇستى-باسى، ولەيىن دەپ،
قورقىراپ ايۋ جاتتى ىڭىرانىپ.
شال تۇرىپ ەندى ورنىنان ەسەن-امان،
جاقىنداپ جۇمىسكەرگە كەلدى تامان:
«اۋمەسەر، اقىلىڭ جوق، يت-دوڭىز!» - دەپ،
بايعۇستى بالاعاتتاپ، سوكتى جامان.
«ۇرساسىڭ نەگە، شالىم، ماعان، - دەدى، -
سوككەندەي نە ىستەدىم ساعان؟ - دەدى. -
جازعانىم، مەنىڭ سەنى ايۋ - جاۋدان
ايىرىپ العانىم با امان؟!» - دەدى.
شال ايتتى: «كورمەيمىسىڭ نە ەتكەنىڭدى،
جەلىگىپ جىندانۋعا جەتكەنىندى،
بارداي-اق اكەڭ قۇنى، سونشا شانشىپ،
تەرىسىن ىسكە العىسىز ەتكەنىڭدى؟!»

* * *
ءسوز جازدىم ۇگىت ءۇشىن بوزبالاعا،
وسىنداي ەلدە ۋاقيعا از عانا ما؟
قايىرىڭ نادانعا ەتكەن - شاشقان مۇلكىڭ،
بولادى ءراسۋا قۇر دالاعا.
قۇدايىم، جولداس قىلما جاماندارعا،
كوزى تار، كوڭىلى سوقىر ناداندارعا!
جاقسىلىق ەتسەڭ دە ءبىر، ەتپەسەڭ دە،
جاقپايسىڭ كەي اقىماق ادامدارعا.


You Might Also Like

جاڭالىقتار

جارناما