استانادا اۆاريالىق باراك تۇرعىندارى ەسكى تۇرعىن ءۇيدى رەنوۆاسيالاۋ باعدارلاماسى بويىنشا كوشىرۋ كەزىندە قيىندىققا تاپ بولدى. سەبەپ — شارشى مەترگە قاتىستى كەلىسپەۋشىلىك، دەپ حابارلايدى infohub.kz سايتى.
تەلەارنانىڭ دەرەگىنشە، 2021 جىلى گەرسەن كوشەسى، 2ا مەكەنجايىنداعى باراك اۆاريالىق دەپ تانىلعان. رەنوۆاسيا باعدارلاماسى بويىنشا ءۇيدى بۇزۋ جانە تۇرعىنداردى كوشىرۋ كەزەگى بيىل عانا كەلدى. الايدا كوپتەن كۇتكەن كىلتتەردىڭ ورنىنا ەكى وتباسى كوميسسيادان باس تارتۋ الدى. تۇرعىندار ءوز پاتەرلەرىنە قوسىمشا بولمەلەر سالىپ، تۇرعىن الاڭنىڭ ۇلعايعانىن زاڭدى تۇردە تىركەگەندەرىن ايتادى. ءبىراق كوشىرۋ كەزىندە اكىمدىك جاڭا شارشى مەتر بويىنشا جاڭا پاتەر بەرۋدەن باس تارتتى. ونىڭ ورنىنا تەك باستاپقى الاڭعا سايكەس تۇرعىن ءۇي ۇسىنىپ وتىر، ول 5 ەسە از.
مىسالى، مەنشىك يەلەرىنىڭ ءبىرى 300 شارشى مەتر ەسەبىنەن تۇرعىن ءۇي بەرۋدى سۇرايدى، ءبىراق شەنەۋنىكتەر تەك باستاپقى 54 شارشىنى عانا ەسكەرەدى. ەر ادام 13 جىل بويى بالا تاربيەلەپ، ءۇيدى سالىپ، بارلىق قۇجاتتاردى حقكو ارقىلى ادال راسىمدەگەنىن ايتادى.
«ءبىز كەلىسپەيمىز، بارلىق جەرگە شاعىم جازامىز. سەبەبى بىزدە 2-نىسان بويىنشا 300 شارشى مەتر شىعادى. ال ولار ەسكىسى بويىنشا، ءۇيدى ساتىپ العاندا 54 شارشى بولعان دەپ ايتادى. ال ءبىز زاڭداستىرعان، سالعان قوسىمشالارىمىزدى مۇلدە ەسەپكە المايدى. ءبىراق بىزدە بارلىق قۇجات بار، ءبارى زاڭدى»، — دەپ اشۋلاندى استانا تۇرعىنى مەرەكە نازىروۆ.
تۇرعىندار زاڭسىز ارەكەت تۋرالى ءسوز بولمايتىنىن، ۇيگە ەشقانداي اۋىرتپالىق تىركەلمەگەنىن ايتادى. سونىمەن قاتار، قالالىق تۇرعىن ءۇي باسقارماسى پاتەردەگى قوسىمشا قۇرىلىستاردى بيىل عانا، كوشىرۋ قارساڭىندا راسىمدەگەندەرىن تۇسىندىرەدى. ءبىراق ءۇي رەسمي تۇردە 5 جىل بۇرىن اۆاريالىق دەپ تانىلعاندىقتان، زاڭ وندا كەز كەلگەن قايتا قۇرۋ مەن كەڭەيتۋگە تىيىم سالادى.
«قازىرگى جاعدايدا اۆاريالىق ءۇي تۇرعىندارى زاڭسىز قوسىمشا قۇرىلىستار سالىپ، ولاردى زاڭداستىراتىن كوپتەگەن جاعدايلار انىقتالدى. وسى باعدارلاما اياسىندا اۆاريالىق ۇيلەردەگى ءوز بەتىنشە سالىنعان قوسىمشا قۇرىلىستاردى زاڭداستىرۋعا زاڭناما جول بەرمەيدى»، — دەپ ءتۇسىندىردى استانا تۇرعىن ءۇي جانە تۇرعىن ءۇي ينسپەكسياسى باسقارماسىنىڭ باس مامانى رايحان دجولدينوۆا.
ءقازىر قالا بيلىگى مەن تۇرعىنداردىڭ ءوزى اۆاريالىق باراكتاعى قوسىمشا قۇرىلىستاردىڭ زاڭدىلىعى تۋرالى داۋعا نۇكتە قويۋ ءۇشىن سوت پروسەستەرىنە دايىندالۋدا.