قازاقستاننىڭ اۋىل شارۋاشىلىعى مينيسترلىگى بۇۇ-نىڭ ازىق-ت ۇلىك جانە اۋىل شارۋاشىلىعى ۇيىمىمەن (فاو) بىرلەسىپ، ەلدىڭ اگروونەركاسىپ كەشەنىن جاڭعىرتۋعا باعىتتالعان ءۇش ستراتەگيالىق جوبانى ىسكە اسىرۋعا كىرىستى. باستامالار شەگىرتكەنى باقىلاۋ ءۇشىن جاساندى ينتەللەكتتى ەنگىزۋدى، توپىراق جاعدايىن باعالاۋ جۇيەسىن قۇرۋدى جانە وتاندىق سەلەكسيانى دامىتۋدى، سونىڭ ىشىندە ايگىلى الما سورتى – الماتى اپورتىن قايتا جاڭعىرتۋدى كوزدەيدى، دەپ حابارلايدى infohub.kz.
جوبالاردىڭ رەسمي تۇساۋكەسەرى استانادا وتكەن كىرىسپە سەمينار بارىسىندا جاسالدى. بۇل سەمينار اۋىل شارۋاشىلىعى مينيسترلىگى مەن فاو اراسىنداعى ارىپتەستىك باعدارلاماسى اياسىندا ۇيىمداستىرىلعان.
«ارىپتەستىك باعدارلاماسى – ون جىلعا ەسەپتەلگەن، قازاقستان ۇكىمەتى مەن فاو اراسىنداعى ۇزاقمەرزىمدى ىنتىماقتاستىق تەتىگى. ونىڭ نەگىزگى ماقساتى – اۋىل شارۋاشىلىعىنىڭ تۇراقتى دامۋىنا جاردەمدەسۋ، ازىق-ت ۇلىك قاۋىپسىزدىگىن نىعايتۋ، زاماناۋي تەحنولوگيالاردى ەنگىزۋ جانە وزىق حالىقارالىق تاجىريبەنى پايدالانۋ»، – دەپ ءتۇسىندىردى اشم-دا.
ءىس-شارا بارىسىندا اۋىل شارۋاشىلىعى ۆيسە-مينيسترى ەرمەك كەنجەحان ۇلى فاو-نىڭ ەۋروپا جانە ورتالىق ازيا جونىندەگى وڭىرلىك وكىلىنىڭ ورىنباسارى رايمۋنت يەلەمەن كەزدەستى. تاراپتار قولدانىستاعى ىنتىماقتاستىق باعدارلاماسىنىڭ ىسكە اسىرىلۋىن، ودان ءارى ءوزارا ءىس-قيمىلدىڭ كەلەشەگىن، اگرارلىق سالاعا زاماناۋي تەحنولوگيالاردى ەنگىزۋدى جانە عىلىمي ىنتىماقتاستىقتى دامىتۋدى تالقىلادى.
ەرمەك كەنجەحان ۇلىنىڭ ايتۋىنشا، جاڭا باستامالار بويىنشا نەگىزگى قۇجاتتاردى دايىنداۋ اياقتالۋ ساتىسىنا جەتكەن. «ساراپشىلار توپتارىمىزدىڭ بىرلەسكەن كۇش-جىگەرىنىڭ ارقاسىندا نەگىزگى قۇجاتتاردى ازىرلەۋ اياقتالۋ ساتىسىنا شىقتى. ءاربىر جوبانىڭ حالىقارالىق ستاندارتتارعا جانە ەلدىڭ اوك دامىتۋدىڭ ۇلتتىق باسىمدىقتارىنا ساي كەلۋى ماڭىزدى. جوبالاردىڭ ىسكە قوسىلۋى وتاندىق اۋىل شارۋاشىلىعىن تەحنولوگيالىق جاڭعىرتۋعا ايتارلىقتاي سەرپىن بەرەتىنىنە سەنىمدىمىن»، – دەدى ۆيسە-مينيستر.
ءبىرىنشى جوبا توپىراقتىڭ ورگانيكالىق كومىرتەگىن مونيتورينگتەۋ، باعالاۋ جانە راستاۋدىڭ ۇلتتىق جۇيەسىن قۇرۋدى كوزدەيدى. بۇل جۇيە جەر رەسۋرستارىن ءتيىمدى باسقارۋعا، توپىراق قۇنارلىلىعىن ارتتىرۋعا جانە ۇلتتىق كومىرتەگى نارىعىن دامىتۋعا عىلىمي نەگىز بولۋى ءتيىس.
ەكىنشى باعىت اۋىل شارۋاشىلىعى زيانكەستەرىمەن كۇرەستى سيفرلاندىرۋعا بايلانىستى. شەگىرتكەنىڭ تارالۋىن باقىلاۋ جانە بولجاۋ جۇيەسىن جاساندى ينتەللەكت پەن ۇشقىشسىز ۇشۋ اپپاراتتارى تەحنولوگيالارىن قولدانا وتىرىپ جەتىلدىرۋ جوسپارلانۋدا. بۇل زيانكەستەردىڭ تارالۋ وشاقتارىن تەزىرەك انىقتاۋعا، بولجام دالدىگىن ارتتىرۋعا جانە شەشىم قابىلداۋدىڭ جەدەلدىگىن كوتەرۋگە مۇمكىندىك بەرەدى.
ءۇشىنشى جوبا – «قازاقستاندىق سورتتار مەن تۇقىمدار» ۇلتتىق باستاماسىن ىسكە اسىرۋ. بۇل باستاما وتاندىق سەلەكسيا مەن تۇقىم شارۋاشىلىعىن دامىتۋعا، وسىمدىكتەردىڭ گەنەتيكالىق رەسۋرستارىن ساقتاۋعا جانە قازاقستاندىق اۋىل شارۋاشىلىعى داقىلدارىنىڭ سورتتارىن ناسيحاتتاۋعا باعىتتالعان.
«وسى باستاما اياسىندا قازاقستاندىق باۋ-باقشا شارۋاشىلىعىنىڭ سيمۆولدارىنىڭ ءبىرى سانالاتىن اتى اڭىزعا اينالعان الما سورتى – الماتى اپورتىن قايتا جاڭعىرتۋعا جانە تانىمال ەتۋگە ەرەكشە كوڭىل بولىنەدى»، – دەپ اتاپ ءوتتى ۆەدومستۆو.
ەكى كۇن بويى اۋىل شارۋاشىلىعى مينيسترلىگىنىڭ، فاو-نىڭ، بۇۇ جۇيەسى اگەنتتىكتەرىنىڭ، عىلىمي-زەرتتەۋ ينستيتۋتتارىنىڭ، سالالىق قاۋىمداستىقتاردىڭ جانە جەكە سەكتوردىڭ وكىلدەرى جوبالاردىڭ تەحنيكالىق پارامەترلەرىن قاراپ، جىلدىق جۇمىس جوسپارلارىن بەكىتىپ، ۆەدومستۆوارالىق ءوزارا ءىس-قيمىل تەتىكتەرىن ايقىندايدى. سونداي-اق سەمينار قاتىسۋشىلارى يننوۆاسيالىق تەحنولوگيالاردى ەنگىزۋ، كليماتقا ءتوزىمدى اۋىل شارۋاشىلىعىن دامىتۋ، اگروونەركاسىپ كەشەنىن سيفرلاندىرۋ، وسىمدىكتەردىڭ گەنەتيكالىق رەسۋرستارىن ساقتاۋ، تابيعي رەسۋرستار مونيتورينگىن جەتىلدىرۋ جانە اۋىل شارۋاشىلىعى تاۋەكەلدەرىن باسقارۋ تيىمدىلىگىن ارتتىرۋ ماسەلەلەرىن تالقىلايدى.