قازاقستاننىڭ دەنساۋلىق ساقتاۋ مينيسترلىگى ازاماتتاردى ەمدەۋ باستالماي تۇرىپ شەتەلدىك مەديسينالىق ورتالىقتاردى مۇقيات تەكسەرۋگە شاقىردى. ۆەدومستۆو قانداي كريتەريلەرگە ءبىرىنشى كەزەكتە نازار اۋدارۋ كەرەكتىگىن ايتىپ، تاۋەكەلدەردەن ساقتانۋعا كومەكتەسەتىن كەڭەستەر بەردى، دەپ حابارلايدى infohub.kz سايتى.
كەز كەلگەن شەتەلدىك مەديسينالىق ورتالىققا جۇگىنبەس بۇرىن، ول تۋرالى بارلىق قولجەتىمدى اقپاراتتى زەردەلەۋ، اككرەديتاسياسىنىڭ بار-جوعىن تەكسەرۋ، دارىگەرلەردىڭ تاجىريبەسى مەن ۇسىنىلاتىن جاعدايلارعا كوز جەتكىزۋ قاجەت. اتاپ ايتقاندا، كەلەسى كريتەريلەردى باسشىلىققا الۋ ۇسىنىلادى: كلينيكانىڭ حالىقارالىق اككرەديتاسياسىنىڭ بولۋى (JCI، ISO جانە ت.ب.)؛ دارىگەرلەردىڭ بىلىكتىلىگى جانە قاجەتتى ەم تۇرلەرىن جۇرگىزۋ تاجىريبەسى؛ دياگنوستيكا مەن تەراپيانىڭ دالەلدى ادىستەرىن قولدانۋ؛ ەم قۇنى، كەزەڭدەرى جانە ىقتيمال ناتيجەلەر تۋرالى اقپاراتتىڭ اشىقتىعى؛ مەديسينالىق ۇيىم قىزمەتىنىڭ رەسمي راستالۋى.
«ازاماتتارعا تولىق ساۋىعۋدى ۋادە ەتەتىن، تەكسەرىلمەگەن ەمدەۋ ادىستەرىن ۇسىناتىن نەمەسە تولىق كونسۋلتاسيا مەن مەديسينالىق قۇجاتتاردى تالداۋسىز شەشىم قابىلداۋدى تالاپ ەتەتىن ۇسىنىستارعا ساقتىقپەن قاراۋ كەرەك»، – دەلىنگەن حابارلامادا.
دەنساۋلىق ساقتاۋ مينيسترلىگىندە بەلگىلەنگەن ساپا مەن قاۋىپسىزدىك كريتەريلەرىنە سايكەس كەلەتىن شەتەلدىك مەديسينالىق كلينيكالار ءتىزىمى قازاقستاندىقتاردى بيۋدجەت قاراجاتى ەسەبىنەن شەتەلدە ەمدەلۋگە جىبەرۋ كەزىندە قولدانىلاتىنىن ءتۇسىندىردى. ۆەدومستۆو بۇل اقپارات شەتەلدە كومەك الۋ ءۇشىن مەديسينالىق ۇيىمدى ءوز بەتىنشە تاڭدايتىن پاسيەنتتەرگە پايدالى بولۋى مۇمكىن ەكەنىن اتاپ ءوتتى.
75 كلينيكانى قامتيتىن تىزىممەن سىلتەمە ارقىلى تانىسۋعا بولادى. تىزىمدە رەسەي، بەلارۋس، وڭتۇستىك كورەيا، ءباا، گەرمانيا، ءۇندىستان، تۇركيا، ۋكراينا، يسپانيا جانە سەربيادا ورنالاسقان مەديسينالىق ورتالىقتار ۇسىنىلعان.
بۇعان دەيىن «كۋرسيۆ» جۇرەكتى شەتەلدە ەمدەۋ 20 ملن تەڭگەگە دەيىن جەتۋى مۇمكىن ەكەنىن جازعان بولاتىن.