شەرزات پولاتتىڭ ولىمىنە بايلانىستى سوت وتىرىسىندا جابىرلەنۋشى تاراپتىڭ ادۆوكاتى مەيىرمان شەكەيەۆ مارقۇمنىڭ جاقىندارىنا تولەنۋى ءتيىس مورالدىق جانە ماتەريالدىق وتەماقى مولشەرىن جاريا ەتتى. بۇل تۋرالى ينفوحاب جازادى.
ادۆوكاتتىڭ ايتۋىنشا، نەگىزگى وتەماقى تالاپتارى سوتتالۋشىلار شىناسىل ابزال مەن راۆيل ساكيەۆكە قاتىستى.
اتاپ ايتقاندا، مارقۇمنىڭ اكەسى قارجاۋباي نۇرىموۆ بالاسىنىڭ جەرلەۋ راسىمىنە كەتكەن شىعىن ءۇشىن ابزال شىناسىلدان 2 ملن 794 مىڭ تەڭگە ءوندىرىپ بەرۋدى سۇراعان. بۇدان بولەك، مورالدىق زيان ءۇشىن تومەندەگى سومالار تالاپ ەتىلدى:
- قارجاۋباي نۇرىموۆتىڭ پايداسىنا ابزال شىناسىل مەن راۆيل ساكيەۆتەن – ءارقايسىسىنان 50 ملن تەڭگەدەن، جالپى 100 ملن تەڭگە؛
- اناسى گۇلبارا بەيشەمبيەۆاعا – 100 ملن تەڭگە؛
- اجەسى جۇمابيكە قادىروۆاعا – 100 ملن تەڭگە.
سونداي-اق، شىڭعىس بەلقوجايەۆ، دارحان اسكەنتاي، نۇرقياس يلياسوۆ، ازامات توقتاۋبايەۆ، نۇربولات توقتاۋبايەۆ جانە ديدار قالياحمەتتەن مارقۇمنىڭ تۋىستارى ءارقايسىسىنان 20 ملن تەڭگەدەن ءوندىرىپ الۋدى تالاپ ەتتى. بۇل – قارجاۋباي نۇرىموۆتىڭ پايداسىنا 120 ملن تەڭگە، سونداي-اق اناسى مەن اجەسىنە دە ءدال وسىنداي كولەمدە وتەماقى سۇرالدى.
ادۆوكاتتىڭ مالىمدەۋىنشە، وتەماقى سوماسى پسيحولوگ ماماندار جۇرگىزگەن زەرتتەۋ ناتيجەسى نەگىزىندە انىقتالعان. جەرلەۋ راسىمىنە جۇمسالعان شىعىندى دالەلدەيتىن تۇبىرتەكتەر سوتقا ۇسىنىلعان.