استانادا سوت شەتەلدىك ستريمەر Fasoollka-نى تىكەلەي ەفيرلەردە ارانداتۋشىلىق پىكىرلەر ايتقانى ءۇشىن اكىمشىلىك جاۋاپكەرشىلىككە تارتتى. وعان ايىپپۇل سالىنىپ، قازاقستانعا بەس جىل مەرزىمگە كىرۋ شەكتەلدى، دەپ حابارلايدى infohub.kz سايتى.
ەلوردالىق پوليسيا دەپارتامەنتىنىڭ مالىمەتىنشە، ترانسلياسيا جازبالارى الەۋمەتتىك جەلىلەردى مونيتورينگتەۋ بارىسىندا انىقتالعان. ەفيرلەردە ستريمەر قازاقستاندىق قالالاردىڭ اۋماقتىق تۇتاستىعى مەن مەملەكەتتىك تيىستىلىگى تۋرالى پىكىرلەر ايتىپ، سونداي-اق قازاقستان ازاماتتارىنا، ولاردىڭ مادەنيەتى مەن داستۇرلەرىنە مەنسىنبەي قاراعان.
«شەتەلدىك ازاماتشا سوت شەشىمىمەن ايىپپۇل تۇرىندەگى اكىمشىلىك جاۋاپكەرشىلىككە تارتىلدى. ونىڭ زاڭدا بەلگىلەنگەن تارتىپپەن ەلدەن شىعۋى بويىنشا شارالار قابىلداندى. زاڭناماعا سايكەس وعان قازاقستانعا بەس جىل مەرزىمگە كىرۋ شەكتەلەدى»، — دەپ حابارلادى استانا پوليسيا دەپارتامەنتىندە.
پوليسيا شەتەلدىك ازاماتتار قازاقستاندا بولۋ كەزىندە زاڭنامانى جانە جالپى قابىلدانعان مىنەز-ق ۇلىق نورمالارىن ساقتاۋعا مىندەتتى ەكەنىن اتاپ ءوتتى.
بۇعان دەيىن الەۋمەتتىك جەلىلەردە رەسەيلىك Fasoollka مەن kae4ka ستريمەرلەرىنىڭ قازاقستان مەن قازاقستاندىقتار تۋرالى پىكىرلەرى تالقىلانعان بولاتىن. پايدالانۋشىلار بلوگەرلەردى جاۋاپكەرشىلىككە تارتۋدى تالاپ ەتىپ، Fasoollka-عا قاتىستى ونىڭ پاۆلوداردىڭ اۋماقتىق تيىستىلىگى تۋرالى مالىمدەمەلەرىنە جانە باسقا دا ارانداتۋشىلىق پىكىرلەرىنە نازار اۋدارعان.