قازاقستاندىق تەننيسشى الەكساندر شەۆچەنكو Swiss Open Gstaad-2026 تۋرنيرىندە ءساتتى ونەر كورسەتىپ، جاڭارتىلعان كاسىبي تەننيسشىلەر قاۋىمداستىعى (ATP) رەيتينگىندە 16 ساتىعا كوتەرىلدى. ونىڭ وتانداسى الەكساندر بۋبليك گشتاادتا ءبىرىنشى اينالىمنان كەيىن جارىستان شىعىپ، 11-ورىندى ساقتاپ قالدى جانە ۇزدىك وندىققا جاقىنداپ كەلەدى، دەپ حابارلايدى infohub.kz سايتى.
25 جاستاعى شەۆچەنكو ومىرىندە ەكىنشى رەت ATP ءتۋرنيرىنىڭ جارتىلاي فينالىندا ويناپ، گرەك ستەفانوس سيسيپاستان ءبىر سەت الدى، ءبىراق قالعان ەكەۋىندە جەڭىلىپ قالدى – 4:6، 6:3، 4:6. ەۋروپاداعى ەڭ بيىك تاۋلى ATP ءتۋرنيرى (تەڭىز دەڭگەيىنەن 1050 مەتر بيىكتىكتە) اقىرىندا سيسيپاسقا بۇيىردى. ول فينالدا بەلگيالىق رافاەل كولينوندى 6:4، 6:7 (3:7)، 6:3 ەسەبىمەن جەڭدى.
گشتاادتاعى تابىستىڭ ارقاسىندا شەۆچەنكو رەيتينگتە 16 ساتىدان سەكىرىپ ءوتىپ، ءقازىر 84-ورىندى يەلەنىپ وتىر. روستوۆتا تۋعان تەننيسشى 2024 جىلدان باستاپ قازاقستان اتىنان ونەر كورسەتەدى. ول سپورتتىق ازاماتتىعىن اۋىستىرعان كەزدە الەمنىڭ 45-راكەتكاسى ەدى.
وتكەن جىلعى بيىك تاۋلى گشتاادتىڭ چەمپيونى الەكساندر بۋبليك ءبىرىنشى اينالىمدا فرانسۋز كەنتەن اليسكە 7:6 (7:4)، 4:6، 6:7 (5:7) ەسەبىمەن ەسە جىبەرىپ، رەيتينگتە 11-ورىندا قالدى.
ەكى قازاقستاندىق تەننيسشى دە وسى اپتادا اۆستريالىق كيتسبيۋەلدە وينايدى. بۋبليك 2025 جىلى جەڭىپ العان تيتۋلى مەن رەيتينگتىك ۇپايلارىن قورعاۋى كەرەك. ءبىرىنشى اينالىمدا قازىرگى تروفەي يەسى، ءبىرىنشى ءنومىرلى سەبىلگەن ويىنشى ويىننان بوساتىلعان، كەيىن ارگەنتينالىق فاكۋندو دياس اكوستا (108) مەن يتاليالىق ىرىكتەۋ كەزەڭىنەن وتكەن فەدەريكو چينانىڭ (184) اراسىنداعى جەڭىمپازبەن كەزدەسەدى. شەۆچەنكونى التىنشى ءنومىرلى سەبىلگەن نەمىس يان-لەننارد شترۋففپەن (41) جەكپە-جەك كۇتىپ تۇر.
اۆستريانىڭ اشىق تەننيس چەمپيوناتى 2015 جىلدان باستاپ سپونسورلىق اتاۋمەن Generali Open دەپ اتالادى. ەڭ كونە تەننيس تۋرنيرلەرىنىڭ ءبىرى ءارتۇرلى مارتەبەدە 1894 جىلدان بەرى وتكىزىلىپ كەلەدى. تەك ەرلەر اراسىندا جانە توپىراق كورتتارىندا. قازىرگى ورنالاسقان جەرىنە دەيىن ول پراگادا (اۆسترو-ۆەنگريا كەزىندە)، زالسبۋرگتە، پەرتشاح-ام-ۆەرتەرزەەدە جانە ۆەنادا ءوتتى. ATP-250 ءتۋرنيرىنىڭ جۇلدە قورى – €612،5 مىڭ. ءار جىلدارى ونى امەريكالىق پيت سامپراس، حورۆات گوران يۆانيشەۆيچ، ارگەنتينالىق گيلەرمو ۆيلياس، اۆستريالىق توماس مۋستەر جانە باسقا دا جۇلدىزدار جەڭىپ العان.