قازاقستاندىق تەننيسشى الەكساندر شەۆچەنكو (الەمدىك رەيتينگتە 100-ورىن) ءبىر كۇندە ەكى جەڭىسكە قول جەتكىزىپ، كاسىبي تەننيسشىلەر قاۋىمداستىعىنىڭ (اتپ) 250 ساناتىنداعى Swiss Open Gstaad-2026 ءتۋرنيرىنىڭ جارتىلاي فينالىنا شىقتى، دەپ حابارلايدى infohub.kz.
الدىمەن شەۆچەنكو كەشە جاڭبىرعا بايلانىستى ۇزىلگەن شۆەيساريالىق دومينيك شتريكەرمەن (360) كەزدەسۋدى 7:6 (7:5)، 6:2 ەسەبىمەن اياقتادى. سودان كەيىن شيرەك فينالدا فرانسۋز كەنتەن ءاليستى (90) 7:6 (7:5)، 6:3 ەسەبىمەن ۇتتى. ويىن 1 ساعات 37 مينۋتقا سوزىلدى. شەۆچەنكو ەيستەر بويىنشا قارسىلاسىنان قالىس قالدى (4:7)، ءبىراق برەيكتەردە (1:0) جانە جالپى جيناعان ۇپايلاردا (75:64) باسىم ءتۇستى.
ودان ءبىر كۇن بۇرىن اليس قازاقستاننىڭ ءبىرىنشى راكەتكاسى الەكساندر بۋبليكتى (11) 6:7 (4:7)، 6:4، 7:6 (7:5) ەسەبىمەن جەڭدى. وسىلايشا بۋبليك وتكەن جىلعى تيتۋلىن قورعاي المادى. دەگەنمەن، كۋبوك باسقا ءبىر قازاقستاندىققا بۇيىرۋى مۇمكىن. شەۆچەنكونىڭ جارتىلاي فينالداعى قارسىلاسى كەيىن انىقتالادى.
Swiss Open Gstaad ءتۋرنيرى — شۆەيساريانىڭ تەننيستەن اشىق چەمپيوناتى — 1915 جىلدان بەرى وتكىزىلىپ كەلەدى. 1967 جىلعا دەيىن ول ءارتۇرلى قالالاردا ءوتتى، ال 1968 جىلدان باستاپ تۇراقتى ورنى — شۆەيساريا الپىسىندەگى تانىمال تاۋ شاڭعىسى كۋرورتى گشتااد. بۇل ەۋروپاداعى ەڭ بيىك تاۋلى اتپ ءتۋرنيرى سانالادى (تەڭىز دەڭگەيىنەن 1050 مەتر). 2009 جىلدان باستاپ تۋرنير اتپ-250 ساناتىنا جاتادى. جالپى جۇلدە قورى 612،5 مىڭ ەۋرونى قۇرايدى.
ءار جىلدارى Swiss Open Gstaad تۋرنيرىندە شۆەيساريالىق رودجەر فەدەرەر، رەسەيلىك ەۆگەني كافەلنيكوۆ، شۆەد ستەفان ەدبەرگ، ارگەنتينالىق گيلەرمو ۆيلياس جانە باسقا دا جۇلدىزدار جەڭىسكە جەتكەن.