Neuralink كومپانياسىنىڭ توپ-مەنەدجەرى شيۆون زيليس ميللياردەر يلون ماسكپەن اجىراسقانىن كوپشىلىككە جاريالادى. ول بۇل تۋرالى ح الەۋمەتتىك جەلىسىندە حابارلاپ، بۇل شەشىمدى ماسكتىڭ ءوزى قابىلداعانىن اتاپ ءوتتى، دەپ جازادى infohub.kz سايتى.
ول اجىراسۋدان قاتتى قينالىپ جۇرگەنىن، ءبىراق ءتورت ورتاق بالاسى ءۇشىن ميللياردەرمەن دوستىق قارىم-قاتىناستى ساقتاپ قالۋعا ۇمىتتەنەتىنىن مويىندادى.
«يلونعا تەرەڭ تۇسىنىستىك، قامقورلىق جانە تىنىش، نازىك ءارى سەنىمدى ماحاببات دەگەننىڭ نە ەكەنىن كورسەتە العانىما قۋانىشتىمىن. ونىڭ ەرتە جىلدارىنداعى قيىن جاعدايلاردى، ءجيى تولقىعان جان دۇنيەسىن جانە ادامزات ءۇشىن قانشالىقتى جانقيارلىقپەن كۇرەسەتىنىن ەسكەرسەك، ونىڭ وسى الەمدەگى ەڭ تەرەڭ ءارى بەرىك ماحابباتتى سەزىنگەنىن قالادىم»، — دەپ جازدى ول.
شيۆون زيليس ولاردىڭ قارىم-قاتىناسى ميللياردەردىڭ ومىرىندە جاقسى ءىز قالدىردى دەپ ۇمىتتەنەتىنىن ايتتى، ويتكەنى ولاردىڭ وتباسى ميللياردەر ءۇشىن ءارقاشان شىنايى قۋانىشپەن قارسى الاتىن تىنىش ايلاق بولدى.
«مەن ونى ومىردەن دە ارتىق ءسۇيدىم، ول ماعان ءجۇز ومىرگە جەتەرلىك ءبىلىم بەردى جانە ومىرىمە تەرەڭ ماعىنا سىيلادى. ارينە، جوعالتۋدىڭ ازابى اۋىر، ءبىراق باقىتىمىزعا وراي، بىزدە ءتورت كەرەمەت ءسابي بار — ولار مەنىڭ ومىرىمدەگى باستى ماحابباتىم»، — دەپ قورىتىندىلادى ول.
بۇعان دەيىن يلون ماسك اقش پرەزيدەنتى دونالد ترامپ اكىمشىلىگىمەن كەڭەسشى رەتىندە جۇمىسىن جالعاستىراتىنى بەلگىلى بولدى. ول پەنتاگوننىڭ بولاشاق سوعىستاردى زەرتتەۋ جوباسىنىڭ جەتەكشىلەرىنىڭ ءبىرى بولادى.
ەسكە سالايىق، 2025 جىلدىڭ ناۋرىزىندا زيليس ماسكتان ءتورتىنشى بالاسىنىڭ دۇنيەگە كەلگەنىن حابارلاعان. ميللياردەردىڭ بارلىعى 14 بالاسى بار.