شىعىس قازاقستان وبلىسىندا ينۆەستيسيا كولەمى كەمىندە 110 ملرد تەڭگە بولاتىن اۆتوموبيل جاساۋ كەشەنىن سالۋ جوسپارلانىپ وتىر. جوباعا جۇڭگو ينۆەستورلارى قاتىسادى، ال كاسىپورىننىڭ قۋاتى جىلىنا 80 مىڭ اۆتوموبيلگە جەتەدى، دەپ حابارلايدى infohub.kz سايتى.
ءتيىستى كەلىسىمدى «قازاقستان – جۇڭگو» ينۆەستيسيالىق فورۋمى بارىسىندا شىعىس قازاقستان وبلىسىنىڭ اكىمى East Motors Corporation كومپانياسىمەن جاسادى. قۇجات جەڭىل اۆتوموبيلدەر، ارنايى تەحنيكا جانە زاماناۋي قوزعالتقىشتار شىعاراتىن كەشەن سالۋدى كوزدەيدى.
جوبا ءىرى توراپتىق (DKD/SKD) قۇراستىرۋدان باستاپ، ۇساق توراپتىق (CKD) قۇراستىرۋعا كەزەڭ-كەزەڭىمەن كوشۋدى، دانەكەرلەۋ جانە بوياۋ وندىرىستەرىن دامىتۋدى جانە جەرگىلىكتى قامتۋ دەڭگەيىن ارتتىرۋدى قامتيدى. جوبالىق قۋاتقا شىققان سوڭ ءوندىرىس كولەمى جىلىنا 80 مىڭ اۆتوموبيلگە دەيىن جەتەدى. جەرگىلىكتى قامتۋدى 50%-عا جەتكىزىپ، ودان ءارى ۇلعايتۋ جوسپارلانۋدا.
جەڭىل اۆتوموبيلدەر ءوندىرۋ ءۇشىن ينۆەستور قۇنى 77،85 ملرد تەڭگە بولاتىن قۋاتتاردى قۇرىپ، جىلىنا كەمىندە 25 مىڭ ماشينا شىعارۋى ءتيىس. تاعى 8،65 ملرد تەڭگە قوسىمشا نەگىزگى قۇرالدارعا قاراستىرىلعان. ءوندىرىس دانەكەرلەۋ، وڭدەۋ، بوياۋ جانە شاناقتاردى قۇراستىرۋدى قامتيدى.
جۇك اۆتوموبيلدەرى، تارتقىشتار جانە ارنايى تەحنيكا ءۇشىن وندىرىستىك اكتيۆتەردىڭ كولەمى كەمىندە 15،14 ملرد تەڭگە، ال قۋاتى جىلىنا 10 مىڭ بىرلىكتەن كەم بولماۋى كەرەك. كاسىپورىندا دانەكەرلەۋ، بوياۋ جانە قۇراستىرۋ، سونداي-اق شاناقتار، كابينالار مەن جابدىقتار ءوندىرىسى جوسپارلانۋدا.
جالپى ينۆەستيسيا كولەمى كەمىندە 110 ملرد تەڭگە بولۋى ءتيىس. زاۋىتتا شىعارىلعان اۆتوموبيلدەردى ەاەو مەملەكەتتەرىنە، ورتالىق ازيا ەلدەرىنە جانە باسقا دا شەتەل نارىقتارىنا ەكسپورتتاۋ جوسپارلانۋدا.
جوبانى East Motors Corporation كومپانياسى جۇزەگە اسىرادى. Adata دەرەكتەرىنە سايكەس، ول قىتايلىق Dongfeng اۆتوكونسەرنىمەن بايلانىسى بولۋى مۇمكىن Dong Feng Kazakhstan، سونداي-اق Tricar Motors كومپانيالارىنا تيەسىلى. سوڭعىسىنىڭ يەلەرى – سەرىك ءاجىمۇراتوۆ، قاراقات مۇحاماديەۆا، دميتري نەستەروۆ، سونداي-اق باسقا كومپانيا ارقىلى سەرىكجان باياحمەتوۆ پەن جاننا شاكەنوۆا.
بۇعان دەيىن وسكەمەندە بۇرىنعى «ازيا اۆتو» اۆتوزاۋىتىنىڭ الاڭىندا جاڭا ءوندىرىس ىسكە قوسىلۋى تالقىلانىپ جاتقانى حابارلانعان. جوبانىڭ ىقتيمال قاتىسۋشىلارىنىڭ قاتارىندا قىتايلىق Dongfeng Motor Corporation بار.