وسكەمەندەگى انا مەن بالا ورتالىعىندا جىل سوڭىنا دەيىن Remebot RM-200 روبوتتى جۇيەسى ورناتىلادى. بۇل جۇيە جوعارى دالدىكتەگى نەيروحيرۋرگيالىق وپەراسيالاردى جۇرگىزۋگە ارنالعان. جاڭا جابدىق شىعىس قازاقستان، اباي جانە پاۆلودار وبلىستارىنىڭ بالالارىنا كورسەتىلەتىن كومەك اياسىن كەڭەيتۋگە مۇمكىندىك بەرەدى، دەپ حابارلايدى infohub.kz سايتى.
قۇنى 433 ملن تەڭگەدەن اساتىن جابدىقتىڭ ءبىر داناسىن الۋعا سەرتيفيكاتتى «سامۇرىق-قازىنا» اق باسقارما ءتوراعاسى نۇرلان جاقىپوۆ شقو-عا جۇمىس ساپارى بارىسىندا ورتالىققا تابىس ەتتى. جابدىق كومپانيالار توبىنىڭ قايىرىمدىلىق قىزمەتى اياسىندا Samruk-Kazyna Trust قورى ارقىلى ساتىپ الىنۋدا.
قازىرگى ۋاقىتتا ورتالىق ءۇش ءوڭىردىڭ بالالارىنا مامانداندىرىلعان نەيروحيرۋرگيالىق كومەك كورسەتىپ كەلەدى. 22 توسەككە ارنالعان بولىمشەدە جوسپارلى جانە شۇعىل وپەراسيالار جاسالادى. سوڭعى ءۇش جىلدا مۇندا اۋىر ەپيلەپسيا تۇرلەرىن VNS-تەراپيانى قولدانۋ ارقىلى حيرۋرگيالىق ەمدەۋ دە جۇرگىزىلۋدە — 33 وپەراسيا جاسالعان.
قىزمەتتىڭ دامۋىنداعى جاڭا كەزەڭ روبوتتى نەيروحيرۋرگيانى ەنگىزۋمەن بايلانىستى. Remebot RM-200 ميدىڭ ءۇش ولشەمدى مودەلىن جاساۋعا، وپەراسيانى الدىن الا جوسپارلاۋعا جانە حيرۋرگيالىق اسپاپتىڭ تراەكتورياسىن سۋبميلليمەترلىك دالدىكپەن بەلگىلەۋگە مۇمكىندىك بەرەدى. ونىڭ كومەگىمەن فارماكورەزيستەنتتى ەپيلەپسيا كەزىندەگى وپەراسيالار، ىسىكتەردىڭ از ءينۆازيۆتى بيوپسياسى جانە باسقا دا كۇردەلى ارالاسۋلار جۇرگىزىلەدى دەپ جوسپارلانۋدا.
«ءبىزدىڭ ءوڭىر ءۇشىن بالالار نەيروحيرۋرگياسىنىڭ دامۋى ەرەكشە ماڭىزعا يە. بۇگىندە ورتالىق ماماندارى ءۇش وبلىستىڭ بالالارىنا كومەك كورسەتىپ، كۇردەلى وپەراسيالار جاساپ، زاماناۋي ەمدەۋ ادىستەرىن دامىتۋدا. جاڭا جابدىق بۇل مۇمكىندىكتەردى كەڭەيتىپ، بۇرىن ءبىزدىڭ وڭىردە قولجەتىمسىز بولعان تەحنولوگيالاردى ەنگىزۋگە جول اشادى. ءبىزدىڭ مىندەتىمىز — مەديسينالىق ينفراقۇرىلىمدى جۇيەلى تۇردە دامىتۋ، مەكەمەلەردى زاماناۋي جابدىقتارمەن جاراقتاندىرۋ جانە دارىگەرلەردىڭ كاسىبي وسۋىنە جاعداي جاساۋ. شىعىس قازاقستان، اباي جانە پاۆلودار وبلىستارىنىڭ بالالارى قاجەتتى جوعارى تەحنولوگيالىق كومەكتى ءدال وسىندا، وسكەمەندە الا الۋى ماڭىزدى»، — دەدى شىعىس قازاقستان وبلىسىنىڭ اكىمى نۇرىمبەت ساكتاعانوۆ.
انا مەن بالا ورتالىعىنىڭ دامۋى وبلىس اكىمدىگىنىڭ، دەنساۋلىق ساقتاۋ جۇيەسىنىڭ، مەديسينالىق مەكەمەنىڭ جانە سەرىكتەستەردىڭ قاتىسۋىمەن جالعاسۋدا. «سامۇرىق-قازىنا» اق-نىڭ Remebot جۇيەسىن ەنگىزۋى كۇردەلى نەيروحيرۋرگيالىق وپەراسيالاردىڭ بالالارعا تىكەلەي وڭىردە قولجەتىمدى بولۋىنا جاسالعان تاعى ءبىر قادام بولماق.