شىعىس قازاقستان وبلىسىندا قىلمىستىق-اتقارۋ جۇيەسى مەكەمەسىنە كەلگەندەر ولتىرىلگەن ادامعا كۇدىكتى دوسىنا تىيىم سالىنعان زات بەرمەك بولدى، دەپ حابارلايدى infohub.kz سايتى.
NUR.KZ اگەنتتىگىنىڭ وبلىس بويىنشا قاجد-عا سىلتەمە جاساپ حابارلاۋىنشا، ەر ادام قازاقستان رەسپۋبليكاسى قىلمىستىق كودەكسىنىڭ 99-بابى «ادام ءولتىرۋ» بويىنشا قىلمىستىق ءىس اياسىندا قاماۋدا وتىر.
ونىڭ دوستارى جولداسىن قولداۋ ءۇشىن تەرگەۋ يزولياتورىنا كەلگەن. الايدا تەكسەرۋ كەزىندە قىزمەتكەرلەر اياق كيىمنىڭ ىشىنەن جاسىرىلعان وسىمدىك تەكتەس زاتتى تاپتى.
تاينيك اياق كيىمنىڭ ۇلتانىنىڭ استىنا مۇقيات جاسىرىلعان. تىيىم سالىنعان زات الىنىپ، ءتۇرى مەن سالماعىن انىقتاۋ ءۇشىن ساراپتاماعا جىبەرىلدى.
«كەلۋشىلەر تانىسىن قولداۋ نيەتىمەن كەلگەن، الايدا تىيىم سالىنعان زاتتى وتكىزۋ ارەكەتى ولاردىڭ وزدەرىنىڭ قۇقىق قورعاۋ ورگاندارىنىڭ نازارىنا ىلىگۋىنە اكەلدى. تابىلعان بارلىق زاتتار زاڭدا بەلگىلەنگەن تارتىپپەن الىنىپ، ودان ءارى تەكسەرۋگە جىبەرىلەدى»، — دەدى شقو بويىنشا قاجد-نىڭ رەسمي وكىلى سالتانات وجيكانوۆا.
وسى فاكتى بويىنشا ماتەريالدار پروسەستىك شەشىم قابىلداۋ ءۇشىن قۇزىرەتتى ورگاندارعا جىبەرىلدى.