شىعىس قازاقستان وبلىسىنىڭ كۇرشىم اۋىلىندا وتباسىلىق دراما ورىن الىپ، سالدارىنان ەكى ادام قازا تاپتى. جەكە تۇرعىن ۇيدەن 31 جاستاعى ايەل مەن ونىڭ ازاماتتىق كۇيەۋىنىڭ دەنەلەرى تابىلدى. وسى فاكتى بويىنشا قىلمىستىق ىستەر قوزعالدى، دەپ حابارلايدى infohub.kz سايتى.
شقو پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، 23 تامىزدا ايەل العان دەنە جاراقاتتارىنان قايتىس بولعان. الدىن الا انىقتالعانداي، جاراقاتتاردى ماس كۇيىندە بولعان ونىڭ بىرگە تۇراتىن ەر ادام كەلتىرگەن. وسىدان كەيىن ەر ادام وز-وزىنە قول جۇمساعان.
وسى فاكتى بويىنشا كۇرشىم اۋدانىنىڭ پوليسيا ءبولىمى قىلمىستىق ىستەر قوزعادى. قازىرگى ۋاقىتتا وقيعانىڭ بارلىق ءمان-جايىن انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە. ۆەدومستۆو قازاقستان رەسپۋبليكاسى قىلمىستىق ءىس جۇرگىزۋ كودەكسىنىڭ 201-بابىنىڭ تالاپتارىنا سايكەس وزگە اقپارات جاريا ەتىلمەيتىنىن قوستى.