شىعىس قازاقستان وبلىسىندا راحمان قاينارىنا باراتىن جولدى جوندەۋ دەمالىسۋشىلارمەن قاقتىعىستارعا اكەلىپ جاتىر، دەپ حابارلايدى infohub.kz سايتى.
قازاۆتوجول كومپانياسىنىڭ مالىمەتىنشە، شقو-دا قازاقستاننىڭ باستى تۋريستىك مارجانى — راحمان قاينارىنا باراتىن جولدىڭ قۇرىلىسى جۇرگىزىلۋدە. جۇمىستار وسكەمەن — التاي — ۇلكەن نارىن — كاتونقاراعاي — راحمان قاينارى اۆتوموبيل جولى ۋچاسكەسىندە جۇرگىزىلۋدە.
«جول جۇمىسشىلارى مەن جول قوزعالىسىنا قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا اسفالتبەتون جابىنىن توسەۋ كەزەڭىندە ساعات 06:00-دەن 18:00-گە دەيىن ۋاقىتشا جول ءجۇرۋ شەكتەۋى قولدانىلادى. سونىمەن قاتار، تۋريستىك ماۋسىمنىڭ قىزۋلىعى مەن ازاماتتاردىڭ كوپتەگەن وتىنىشتەرىن ەسكەرە وتىرىپ، كۇن سايىن 12:00-دەن 13:00-گە دەيىن قوسىمشا كولىك وتكىزۋ ۇيىمداستىرىلعان. شەكتەۋلەر ءدال قارقىندى جول جۇمىستارىنا جانە تار تاۋلى ۋچاسكەدە قاۋىپسىزدىكتى قامتاماسىز ەتۋ قاجەتتىلىگىنە بايلانىستى ەنگىزىلدى»، — دەپ ەسكەرتتى كومپانيادا.
ال قازاۆتوجولدىڭ اقپاراتى بويىنشا، سوڭعى كۇندەرى جۇمىس جۇرگىزىلىپ جاتقان جەردە جەكەلەگەن دەمالىسۋشىلار تاراپىنان اگرەسسيۆتى مىنەز-ق ۇلىق جاعدايلارى جيىلەگەن. بالاعاتتاۋ، قورقىتۋ، جول تەحنيكاسىنىڭ جۇمىسىنا كەدەرگى كەلتىرۋ، سونداي-اق جول قوزعالىسى قاۋىپسىزدىگىن قامتاماسىز ەتەتىن قىزمەتكەرلەرگە قاتىستى كۇش قولدانۋ فاكتىلەرى تىركەلگەن.
«مۇنداي ارەكەتتەرگە جول بەرىلمەيدى. بۇگىن نىساندا جۇمىس ىستەپ جاتقان ادامدار كۇردەلى جاعدايدا كۇن سايىن ءوز جۇمىسىن اتقارىپ ءجۇر — ەرتەڭ مىڭداعان تۋريست راحمان قاينارىنا ءقاۋىپسىز ءارى جايلى جەتە الۋى ءۇشىن. ءاربىر قاقتىعىستان، تەحنيكانى بۇعاتتاۋدان نەمەسە ۋاقىتشا ءجۇرۋ رەجيمىن ساقتاماۋدان تۋىنداعان كىدىرىس جوندەۋ جۇمىستارىنىڭ اياقتالۋ مەرزىمىنە تىكەلەي اسەر ەتەتىنىن ءتۇسىنۋ ماڭىزدى. باسقاشا ايتقاندا، جول قىزمەتتەرىنە قانشا كەدەرگى جاسالسا، ۋاقىتشا شەكتەۋلەر سونشا ۇزاق ساقتالادى»، — دەپ ءتۇسىندىردى كومپانياداعىلار.
ءوڭىر تۇرعىندارى مەن قوناقتارىنا زورلىق-زومبىلىق قولدانۋ، قورقىتۋ، بالاعاتتاۋ، سونداي-اق قىزمەتكەرلەردىڭ زاڭدى قىزمەتىنە جانە جول-قۇرىلىس جۇمىستارىن جۇرگىزۋگە كەدەرگى كەلتىرۋ قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە اكەپ سوعاتىنى ەسكەرتىلدى.