شري-لانكانىڭ جوعارعى سوتى 2019 جىلى پاسحا كۇنى بولعان لاڭكەستىك شابۋىلداردى ۇيىمداستىردى دەپ ايىپتالعان 15 ەركەكتى كىنالى دەپ تانىدى. سول قاندى وقيعادا 270 ادام قازا تاۋىپ، 500-دەن استامى جاراقات العان ەدى، دەپ حابارلايدى infohub.kz سايتى.
پروكۋرورلاردىڭ تۇجىرىمىنشا، ءوزىن-وزى جارىپ جىبەرگەن لاڭكەستەردىڭ باس ۇيىمداستىرۋشىسى سانالعان ناۋفەر ءماۋلاۋي دا كىنالىلەر قاتارىندا. قالعان توعىز ايىپتالۋشى اقتالدى.
ءۇش شىركەۋ مەن ءۇش ءساندى قوناقۇيدە ءبىر مەزگىلدە جاسالعان جارىلىستار 2009 جىلى ازاماتتىق سوعىس اياقتالعاننان بەرگى شري-لانكاداعى ەڭ قاندى شابۋىل بولىپ قالدى. قازا تاپقانداردىڭ اراسىندا 45 شەتەلدىك ازامات بار.
شابۋىلدى جۇزەگە اسىرعان لاڭكەستەردىڭ بارلىعى جارىلىستار كەزىندە قازا تاپتى. تەرگەۋشىلەر بۇعان دەيىن شابۋىلدى يسلامشىل ەكسترەميستەر جاسادى دەپ ايىپتاعان، ال ايىپتاۋ قاعازى ۇسىنىلعان 25 ادام شري-لانكاداعى مۇسىلمان ازشىلىعىنىڭ وكىلدەرى ەدى. ولاردىڭ بىرەۋى قاماۋدا قايتىس بولدى.
ايىپتالۋشىلارعا 23 000-نان استام قىلمىس، سونىڭ ىشىندە كىسى ءولتىرۋ، لاڭكەستىك جاساۋعا ءسوز بايلاسۋ جانە اتىس قارۋىن زاڭسىز يەلەنۋ بويىنشا ايىپ تاعىلعان.