شري-لانكاداعى ەكى بولەك تۇرمەدە بولعان قاقتىعىس سالدارىنان ءۇش تۇتقىن قازا تاۋىپ، جيىرمادان استام ادام جاراقات الدى. بۇل تۋرالى ەلدىڭ قوعامدىق قاۋىپسىزدىك ءمينيسترى اناندا ۆيدجەپالا پارلامەنتتە مالىمدەدى، دەپ حابارلايدى infohub.kz سايتى.
ءمينيستردىڭ ايتۋىنشا، بەيسەنبى كۇنى كەشكە استانا كولومبوداعى ماگازين تۇرمەسىندە 40-قا جۋىق تۇتقىن كامەرالارىنان بۇزىپ شىعىپ، قاقتىعىس كەزىندە ءبىر ادام قازا تاپتى. ال جۇما كۇنى تاڭەرتەڭ استانادان 80 شاقىرىم جەردە ورنالاسقان كۋرۋۆيتا قالاسىنداعى تۇرمەدە تاعى ەكى تۇتقىن قازا تاپتى. ەكى وقيعادا بارلىعى 23 تۇتقىن جاراقات الىپ، اۋرۋحاناعا جات قىزىلدى. ۆيدجەپالانىڭ سوزىنشە، زورلىق-زومبىلىق ەسىرتكى ساتۋشىلار مەن باسەكەلەس قىلمىستىق توپتار اراسىنداعى قاقتىعىستان تۋىنداعان.
تۇرمە اكىمشىلىگى بۇل وقيعاعا بىردەن تۇسىنىكتەمە بەرە المادى. بۇل ءۇش ءولىم ءبىر اي بۇرىن، 6 شىلدەدە نەگومبو تۇرمەسىندە بولعان قاقتىعىستان كەيىن تىركەلدى. سول وقيعادا كەمىندە 26 ادام، ونىڭ ىشىندە جەتى تۇرمە قىزمەتكەرى قازا تاپقان ەدى.
شري-لانكا تۇرمەلەرى قاتتى تولىپ كەتكەن. ادىلەت ءمينيسترى حارشانا ناناياككارانىڭ پارلامەنتتەگى سوڭعى سوزىندە ايتىلعانداي، جۇيەدە نەبارى 10 مىڭ ادامعا ارنالعان ورىنعا 39 مىڭنان استام تۇتقىن وتىر. «تۇتقىندار قۇقىعى جونىندەگى كوميتەتتىڭ» ءتوراعاسى سەناكا پەرەرانىڭ ايتۋىنشا، قازىرگى ۋاقىتتا شري-لانكاداعى تۇتقىندار سانى تۇرمە سىيىمدىلىعىنان ءتورت ەسە ارتىق. ول تۇتقىنداردىڭ شىدامدىلىعىنىڭ دا شەگى بار ەكەنىن اتاپ ءوتتى.
تۇرمەدەگىلەردىڭ كوپشىلىگى ەسىرتكىگە قاتىستى ايىپتار بويىنشا سوتقا دەيىن كۇتىپ وتىرعان كۇدىكتىلەر. پەرەرانىڭ ايتۋىنشا، كەپىلدىك شارتتارىن قاتايتقان سوڭعى زاڭدار تۇرمەلەردىڭ تولىپ كەتۋىنە اكەلدى. تولىپ كەتكەن تۇرمەلەردەگى ناشار ءومىر ءسۇرۋ جاعدايى تۇتقىنداردىڭ ۇنەمى الاڭداۋشىلىعىن تۋدىرىپ، وقيعالارعا سەبەپ بولادى. ونىڭ ۇيىمى بيلىككە ەسىرتكىگە تاۋەلدىلەردى مەديسينالىق پاسيەنتتەر رەتىندە قاراستىرىپ، ولار ءۇشىن جەكە وڭالتۋ ورتالىقتارىن قۇرۋ تۋرالى بىرنەشە رەت ءوتىنىش جاساعان.