29 تامىزدا اقتاۋداعى امفيتەاتر الاڭىندا 15 مىڭنان استام قوناق پەن قالا تۇرعىنىن جيعان رەسپۋبليكالىق شۇبات فەستيۆالى SHUBAT FEST-2026 ءوتتى. ءىس-شاراعا ماڭعىستاۋ، اتىراۋ، قىزىلوردا جانە تۇركىستان وبلىستارىنىڭ وكىلدەرى، سونداي-اق ماڭعىستاۋ وبلىسى اكىمىنىڭ ورىنباسارى تىلەك جەتكىزگەن ۇلى قاتىستى، دەپ حابارلايدى infohub.kz سايتى.
وبلىستىق اكىمدىكتە اتاپ وتكەندەي، فەستيۆالدىڭ باستى ماقساتى — شۇباتتى ۇلتتىق ءونىم رەتىندە تانىمال ەتۋ، ونى دايىنداۋ داستۇرلەرىن ساقتاۋ، تۇيە شارۋاشىلىعىن دامىتۋ جانە وتاندىق ءونىمدى زاماناۋي فورماتتا ىلگەرىلەتۋ.
ورتالىق وقيعا — ۇزدىك شۇبات بايقاۋى بولدى. بارلىعى 83 ءوتىنىم ءتۇسىپ، ونىڭ 41ء-ى الدىن الا ىرىكتەۋدەن ءوتتى. ونىمدەردى زەرتحانالىق زەرتتەۋدەن كەيىن فينالدىق كەزەڭگە 20 قاتىسۋشى جىبەرىلدى، سولاردىڭ اراسىنان «ۇزدىك شۇبات» نوميناسياسى بويىنشا جەڭىمپازدار انىقتالدى.
ءتورت وڭىردەن كەلگەن كاسىپكەرلەر مەن شارۋا قوجالىقتارى ءوز ونىمدەرىن ۇسىندى. فەستيۆال قوناقتارى شۇباتتىڭ ءتۇرلى تۇرلەرىن، سونداي-اق قۇرت، بالقايماق، دەسەرتتەر، كوفە، بالمۇزداق جانە تۇيە سۇتىنەن جاسالعان كوكتەيلدەردى تاتتى. ۇزدىك ونىمدەر حالىق داۋىسىمەن تاڭدالدى.
سۋسىننىڭ ساپاسىنا، قۇرامىنا جانە دايىنداۋ داستۇرلەرىنە ەرەكشە كوڭىل ءبولىندى. فەستيۆال اياسىندا تاجىريبەلى شەبەرلەر مەن شۇبات دايىنداۋ قۇپياسىن مەڭگەرىپ جاتقان جاس ماماندارمەن سۇحباتتار ءوتتى. ساراپشىلار تۇيە ءسۇتىنىڭ تاعامدىق قۇندىلىعى مەن ەرەكشەلىكتەرى تۋرالى ايتتى.
ماراپاتتاۋ ءراسىمىنىڭ الدىندا ماڭعىستاۋ وبلىسى اكىمىنىڭ ورىنباسارى تىلەك جەتكىزگەن ۇلى قۇتتىقتاۋ ءسوز سويلەدى. ول اتا-بابا ءداستۇرىن ساقتاپ، ۇلتتىق ءونىم ءوندىرىسىن دامىتىپ جاتقان شارۋا قوجالىقتارىنىڭ ەڭبەگىن اتاپ ءوتىپ، وبلىس تۇرعىندارى مەن قوناقتارىنا وتاندىق ءونىمدى قولداعانى ءۇشىن، فەستيۆال ۇيىمداستىرۋشىلارى مەن دەمەۋشىلەرىنە العىس ءبىلدىردى.
بايقاۋ قورىتىندىسى بويىنشا قوسىمشا نوميناسيالاردا تۇيە سۇتىنەن جاسالعان ۇزدىك قۇرت، بالقايماق، دەسەرت، كوفە، بالمۇزداق جانە كوكتەيل ۇسىنعان قاتىسۋشىلار جەڭىمپاز اتاندى.
«ۇزدىك شۇبات» باستى نوميناسياسىندا ءۇشىنشى ورىندى ماڭعىستاۋ وبلىسى بەينەۋ اۋدانىنىڭ «نۇر-ابىل» شارۋا قوجالىعى، ەكىنشى ورىندى اتىراۋ وبلىسى جىلىوي اۋدانىنىڭ «ورىنباسار» شارۋا قوجالىعى يەلەندى. ءبىرىنشى ورىندى اقتاۋداعى «تولقىن» شارۋا قوجالىعى جەڭىپ الدى. فەستيۆالدىڭ باس جۇلدەسىن ماڭعىستاۋ وبلىسى جاڭاوزەن قالاسىنداعى «بىرلىك» شارۋا قوجالىعى الدى. جەڭىمپازعا رەسمي دەمەۋشى — Astana Motors كومپانياسى GWM Poer اۆتوكولىگىن تابىس ەتتى.
قوناقتارعا ارنالعان مەرەكەلىك باعدارلامانى ماڭعىستاۋ وبلىستىق فيلارمونياسىنىڭ ارتىستەرى، راحىمجان جاقايىم، جۇبانىش جەكسەن ۇلى جانە «جىگىتتەر» كۆارتەتى ۇسىندى.
SHUBAT FEST-2026 رەسپۋبليكالىق فەستيۆالى شۇباتتى تانىمال ەتۋ، وتاندىق وندىرۋشىلەردى قولداۋ جانە تۇيە شارۋاشىلىعىن دامىتۋدىڭ اۋقىمدى الاڭىنا اينالدى. ءتورت وبلىستىڭ قاتىسۋى مەن 15 مىڭنان استام كەلۋشىنىڭ قىزىعۋشىلىعى ۇلتتىق ونىمگە جانە ونى ءوندىرۋ داستۇرلەرىنە جوعارى قوعامدىق قىزىعۋشىلىقتى راستادى.